ABŞ müdafiə naziri Pit Heqset bildirib ki, ABŞ-nin İrana zərbələri ölkə rəhbərliyini dəyişməyə deyil, yalnız onun nüvə proqramına yönəlib.

ABŞ Prezidenti Donald Trampın administrasiyası da İran nüvə obyektlərinə endirilən zərbələrin rejim dəyişikliyinə yönəlmiş müharibənin başlaması olmadığını bildirib.

Maraqlıdır, ABŞ-nin hücumları necə yekunlaşacaq?

Bununla bağlı Sfera.az-a açıqlama verən siyasi şərhçi Kənan Novruzov ümumi vəziyyətin olduqca gərgin olduğunu deyib. O bildirib ki, ABŞ-nin prosesə müdaxiləsindən sonra İrana birbaşa zərbə endirməsi vəziyyəti daha da kəskinləşdirib:

“Bu hadisədən sonra Çinin də İranın tərəfində prosesə qoşulması ehtimalı istisna deyil. İranın xarici işlər naziri Abbas Əraqçi bu gün Moskvada rəsmi səfərdə olacaq. Böyük ehtimalla bu səfərin əsas məqsədi Yaxın Şərqdəki son hərbi proseslərlə bağlı müzakirələr aparmaqdır".

Şərhçi İranın bu səfər çərçivəsində Rusiyadan siyasi və ya hərbi dəstək istəməsinin mümkünlüyündən bəhs edib:

“Hərçənd Rusiyanın belə bir dəstəyi təmin edəcək real potensialı məhduddur. Lakin bütövlükdə hazırkı proses üçüncü dünya savaşına və nüvə silahının təhdidinə doğru gedir. ABŞ rəsmiləri, istər Müdafiə Nazirliyinin rəhbəri, istərsə də prezident Donald Tramp rəsmi açıqlamalarda bildirirlər ki, məqsədləri İranda rejimi dəyişmək deyil. Lakin bu bəyanatlar daha çox beynəlxalq ictimaiyyətin gözünü yummaq üçün verilmiş açıqlamalardır. Əslində, İranın nüvə silahı əldə etməyə can atması ABŞ üçün nə qədər risklidirsə, İrandakı rejim də bir o qədər təhlükəlidir”.

K.Novruzov ABŞ-nin gizli şəkildə İran hakimiyyətində dəyişiklik yaratmaq niyyətində olmasının artıq şübhə doğurmadığını vurğulayıb. O qeyd edib ki, hər nə qədər bunu açıq şəkildə dilə gətirməsələr də, ölkəni daxildən zəiflətmək, iqtisadi və siyasi təzyiqlərlə tükəndirmək strategiyası həyata keçirilir:

“Bu yanaşma birbaşa hədəf kimi göstərilməsə də, hadisələrin axarı dolayısı ilə rejim dəyişikliyinə aparır. Belə bir ssenaridə İranda siyasi çevriliş ehtimalı da gündəmə gələ bilər. Hətta istisna deyil ki, ali dini lider Ayətullah Əli Xameneiyə qarşı sui-qəsd və ya buna cəhd kimi təhlükəli hadisələr baş versin”.

Fidan Hacızadə

Sfera.az

İranda hakimiyyət dəyişəcək? - AÇIQLAMA