“Rusiya və ABŞ arasında əvvəllər dayandırılmış dialoqlar artıq bərpa olunub və aktiv şəkildə fəaliyyət göstərir”.

Sfera.az “TASS”agentliyinə istinadən xəbər verir ki, bu sözləri Kremlin sözçüsü Dmitri Peskov deyib.

O, Moskva və Vaşinqtonun münasibətlərdə addım-addım irəliləməyə hazır qalmasının hazırkı şəraitdə xüsusilə vacib olduğunu vurğulayıb.

“İki prezident arasında aparılan danışıqlar, əslində, yalnız aysberqin görünən hissəsidir. Bu danışıqların davamı olaraq, ABŞ Dövlət Departamenti ilə Rusiya Xarici İşlər Nazirliyi, prezidentlərin köməkçiləri, xüsusi nümayəndələr və digər qurumlar arasında da əlaqələr mövcuddur”, – deyə Peskov bildirib.

Onun sözlərinə görə, hazırda tərəflər arasında kifayət qədər intensiv iş aparılır:

“İstənilən nəticənin dərhal əldə olunması mümkün deyil. Əsas olan addım-addım irəliləməyə hazır olmaqdır”.

Peskov, eyni zamanda, Rusiya Xarici İşlər Nazirliyi ilə ABŞ Dövlət Departamenti arasında bərpa olunmuş dialoqun qarşısında müəyyən çətinliklərin qaldığını da qeyd edib. O bildirib ki, amerikalılar danışıqların növbəti raundunun Moskvada keçirilməsini təxirə salmaq üçün müraciət ediblər.

“Onlar bunun üçün fasilə təklif etdilər. Görünür, bu zaman onlara lazımdır. Təbii ki, amerikalıların İran-İsrail münaqişəsinə dair məsələlərlə daha intensiv şəkildə məşğul olduqları açıq-aşkardır. Bu, onların İsrailə qeyd-şərtsiz dəstəyi fonunda başa düşüləndir”, – deyə Kremlin nümayəndəsi əlavə edib.

Fidan Hacızadə
Sfera.az

"Amerikalılar İran-İsrail münaqişəsi ilə intensiv məşğul olurlar" - Peskov