Yaxın Şərqdə gərginlik artmaqda davam edir. İranın İsrailə qarşı başlatdığı “Gerçək Vəd-3” adlı raket əməliyyatında indiyədək 300-ə yaxın raket atılıb. İsrailin Tel-Əviv, Ramat Gan, Rişon LeZion və Hayfa kimi şəhərlərinə tuşlanan hücumlar nəticəsində azı 16 nəfər həlak olub, 200-dən çox insan yaralanıb.

Sfera.az “Hürriyet”ə istinadən xəbər verir ki, Tehran bu hücumlarda əsasən “Fettah” və “İmad” kimi ballistik raketlərdən istifadə edib.

Lakin İranın ən müasir və dağıdıcı silahlarından biri sayılan “Hürrəmşəhr” raketi hələ ki istifadəyə olunmayıb.

13 metr uzunluğunda olan və 2 min kilometrlik mənzilə sahib olan “Hürrəmşəhr” raketi Şimali Koreyanın “Hwasong-10” raketinə bənzədilir. Bu raketin ən mühüm xüsusiyyətlərindən biri 1800 kiloqramlıq ağır döyüş başlığı daşıya bilməsidir. Raketin bu gücü, onun yalnız hərbi bazaları deyil, genişmiqyaslı mülki infrastrukturu da hədəfə ala biləcəyini göstərir.

İsrailin “Dəmir Qübbə” adlı hava hücumundan müdafiə sistemi bir çox raketi zərərsizləşdirsə də, İranın atdığı onlarla raket bu sistemdən yayınaraq hədəfə çatıb. İsrail ordusunun nümayəndəsi, general Effie Defrin bildirib ki, “Dəmir Qübbə” dünyanın ən inkişaf etmiş sistemlərindən olsa da, tam mükəmməl deyil və hücumların miqyasının böyüməsi müdafiə imkanlarını sınağa çəkir.

İranlı rəsmilər isə İsrail hücumlarının davam edəcəyi təqdirdə daha sərt cavab veriləcəyini bəyan ediblər. Ayətullah Əli Xamenei, qatledilən iranlıların əvəzinin ən ağır şəkildə çıxılacağını açıqlayıb.

Hərbi ekspertlərə görə, İran hələlik köhnə texnologiyalı raketlərdən istifadə edərək İsrailin hava müdafiəsini zəiflətməyə çalışır. Sonrakı mərhələdə “Hürrəmşəhr” kimi strateji silahlardan istifadə olunacağı gözlənilir.

İranın “Hürrəmşəhr” raketindən istifadə etməsi, təkcə İsrail üçün deyil, bütün region üçün müharibənin yeni və daha dağıdıcı mərhələyə keçməsi demək olacaq. Hazırkı vəziyyət, tərəflərin yaxın günlərdə daha sərt addımlar ata biləcəyini göstərir.

Bəsti Rəfizadə
Sfera.az

“Hürrəmşəhr” raketi ehtiyatdadır – Tehran bu dağıdıcı silahdan istifadə edəcəkmi?