Ukrayna diversiya hərəkətlərini buna görə edir - Ekspert

Son günlər Rusiya ərazisində Ukraynanın həyata keçirdiyi diversiya aktlarının sayı artmaqdadır. Ukrayna Silahlı Qüvvələri və xüsusi təyinatlı dəstələri Rusiya daxilində xüsusilə strateji əhəmiyyət daşıyan məntəqələrə – hava limanları, dəmir yolları, yanacaq anbarları və hərbi infrastruktur obyektlərinə hücumlar təşkil edir. Hərbi müstəvidə olduğu kimi informasiya və psixoloji sahədə də Ukrayna üstünlük əldə etməyə çalışır.

Mövzu ilə bağlı Sfera.az-a açıqlama verən politoloq Məhəmməd Əsədullazadə bildirib ki, Ukraynanın bu taktiki gedişləri Rusiyanı fakt qarşısında qoyur və Kremlin ciddi itkilər verməsinə səbəb olur:

“Ukrayna Rusiya ərazisində həyata keçirdiyi zərbələrlə Kremlin kapituliyasiya və ya geri çəkilmə ehtimalını gündəmə gətirir. Bu, əslində danışıqlarda güzəştə getməyən Moskvanı cəzalandırmaq məqsədi daşıyır. Ukrayna açıq şəkildə göstərmək istəyir ki, o zəif deyil və Rusiya ərazisində yüksək dəqiqlikli, strateji əhəmiyyətli hücumlar təşkil etməyə qadirdir. Bu da onun Qərbə yönəlik mesajıdır. Ukrayna müharibəni davam etdirmək və nəticə əldə etmək imkanına sahib olduğunu göstərir”.

Politoloq qeyd edir ki, bu hücumlarla Ukrayna, Rusiya dövlətçiliyini hədəf alan Kremlə cavab verir və öz dözümlülüyünü nümayiş etdirir:

“Rusiya açıq şəkildə Ukraynanın dövlətçiliyini məhv etməyə çalışır. Lakin Ukrayna tərəfi cavab olaraq Rusiyanın daxilindəki strateji nöqtələri vurmaqla təkcə hərbi əməliyyatların tempini zəiflətdiyini deyil, eyni zamanda Rusiyanın düşündüyü qədər güclü olmadığını da sübut edir. Bu, Ukraynaya siyasi və psixoloji sahədə üstünlük qazandırır”.

M. Əsədullazadənin sözlərinə görə, hazırda bu taktikalar tam hədəfə çatmasa da, uzunmüddətli perspektivdə Ukraynanın hərbi əməliyyatlarda üstün mövqeyə çıxmasına kömək edə bilər:

“Ukrayna bu hücumlarla gələcəkdə Rusiya ordusunun hərbi planlarını və əməliyyat imkanlarını əngəlləməyə nail ola bilər. Əsas strateji məntəqələrin hədəfə alınması Rusiya hərbi maşınının yavaşlamasına, logistikanın çökdürülməsinə və ümumi döyüş qabiliyyətinin zəifləməsinə səbəb olacaq.
Ukraynanın diversiya aktları yalnız hərbi deyil, siyasi və diplomatik müstəvidə də yeni reallıqlar formalaşdırır. Rusiya isə artan daxili təhdidlər və strateji infrastruktur itkiləri fonunda daha çətin vəziyyətə düşür. Bu, regionda müharibənin gedişatına və potensial sülh danışıqlarına birbaşa təsir göstərmək potensialına malikdir”.

Bəsti Rəfizadə
Sfera.az