Rusiya Prezidenti Vladimir Putinin “qarşısıalınmaz” adlandırdığı “Oreşnik” adlı orta mənzilli ballistik raket sistemlərinin 2025-ci ilin sonuna qədər Belarus ərazisində yerləşdirilməsi planlaşdırılır.

Sfera.az “NTV”yə istinadən xəbər verir ki, bu barədə Belarus Təhlükəsizlik Şurasının katibi Aleksandr Volfoviç məlumat verib.

Volfoviçin sözlərinə görə, raketlərin yerləşdiriləcəyi ərazilər artıq müəyyən olunub. O bildirib ki, sözügedən sistemlərin Belarusda yerləşdirilməsi iki ölkə arasında 2023-cü ildə imzalanmış hərbi əməkdaşlıq sazişinə əsaslanır.

Kremlə yaxın jurnalist Aleksandr Yunaşevin məlumatına əsasən, Belarus Prezidenti Aleksandr Lukaşenko 2024-cü ilin dekabrında Moskvaya müraciət edərək 10 ədəd “Oreşnik” raket kompleksinin ölkəsində yerləşdirilməsini istəyib.

Rusiyalı hərbi ekspert Viktor Baranets bu raketlərin 3–6 döyüş başlığı daşıya bildiyini, yüksək sürəti ilə hava hücumundan müdafiə sistemlərini aşa bildiyini bildirib. Prezident Putin də daha əvvəl “Oreşnik” raketinin saniyədə 2,5–3 kilometr sürətlə hərəkət etdiyini və hazırkı müdafiə sistemlərinin onu dayandıra bilmədiyini qeyd etmişdi.

Məlumatlara görə, “Oreşnik” raketləri nüvə başlığı daşımaq imkanına malikdir. Lakin Rusiya 2024-cü ilin 21 noyabrında Ukraynanın Dnipro şəhərinə hücum zamanı bu raketlərdən birini nüvə başlığı olmadan istifadə edib.

Rusiya Nüvə Qüvvələri Layihəsinin rəhbəri Pavel Podviq isə bildirib ki, bu raketlər ABŞ üçün təhdid yaratmasa da, bütün Avropa üçün ciddi təhlükə hesab oluna bilər.
Xatırladaq ki, Belarus 2023-cü ilin oktyabr ayında Rusiya taktiki nüvə silahlarının ölkə ərazisinə tam köçürüldüyünü elan etmişdi. Ekspertlərə görə, bu addımlar Belarusun regiondakı hərbi əhəmiyyətini artırmaqla yanaşı, Avropadakı təhlükəsizlik balansını da dəyişə bilər.

Bəsti Rəfizadə
Sfera.az

Rusiya bu ölkəyə “Oreşnik” yerləşdirəcək