Almaniya Silahlı Qüvvələrinin Baş Qərargah rəisi general Karsten Broer ölkə ordusuna 2029-cu ilə qədər tam şəkildə silahlandırılma və müharibəyə hazırlıq əmri verib. General Rusiyanın həmin vaxta qədər NATO ərazilərinə qarşı genişmiqyaslı hücum potensialı qazana biləcəyini deyib.

Sfera.az xarici mediaya istinadən xəbər verir ki, Broerin 19 may tarixində imzaladığı “Hazırlığın Artırılması üçün Prioritet Təlimatlar” adlı sənəddə Almaniya ordusunun tam təchizatlı hala gətirilməsi üçün atılacaq konkret addımlar və prioritetlər müəyyən edilib.

Prioritetlər nələrdir?

Təlimata əsasən Almaniya hava hücumundan müdafiə sistemlərini, xüsusilə də pilotsuz uçuş aparatlarına qarşı tədbirləri gücləndirəcək.

500 km-dən uzaqda yerləşən və düşmən arxasında olan hədəflərə dəqiq zərbələr endirə biləcək imkanlar yaradılacaq.

Təchizat ehtiyatlarının artırılması və bütün kateqoriyalar üzrə təchizat səviyyəsinin yüksəldiləcək.

Almaniya həmçinin elektron müharibə imkanlarını inkişaf etdirməyə və kosmosda dayanıqlı müdafiə-hücum qabiliyyətləri qurmağa çalışacaq.

General Broer ilə yanaşı alman ordusunun digər yüksək vəzifəli komandiri Alfons Mais də açıqlama verib. O Rusiyanın 2029-cu ilə qədər NATO ərazisinə qarşı böyük miqyaslı hücum planlaya biləcəyini söyləyib:

“Ən gec 2029-cu ildən etibarən Rusiya ordusu NATO ərazilərinə qarşı müharibəyə başlaması və hücuma keçməsi ehtimalı yüksəkdir. Amma bizi test etməyə daha erkən başlaya da bilərlər”.

Xatırladaq ki, ötən il yayılan məlumatlara görə, NATO rəhbərliyi Almaniyadan hava hücumundan müdafiə qabiliyyətini, o cümlədən "Patriot" sistemləri kimi müdafiə vasitələrini dörd dəfə artırmağı istəyib.

Alman komandanlığının bu xəbərdarlıqları, Avropada təhlükəsizlik müzakirələrini və müdafiə planlamasını bir daha gündəmə gətirib.

Bəsti Rəfizadə
Sfera.az

Böyük müharibə gözlənilir - Orduya "Hazır ol!" deyildi