ABŞ Rusiya ilə Ukrayna arasında dialoqun qurulmasında effektiv vasitəçilik rolu oynayıb. Bu barədə Rusiya Prezidentinin mətbuat katibi Dmitri Peskov jurnalistlərə açıqlama verib. Onun sözlərinə görə, ABŞ-nin son günlərdə nümayiş etdirdiyi diplomatik təşəbbüslər Rusiya-Ukrayna əlaqələrinin qurulmasında təsirli olub.

ABŞ-nin Rusiya-Ukrayna müharibəsinin sülhlə nəticələnməsini istəməsinin arxasında hansı siyasi maraqlar dayanır? Trampın səyləri nəticə verəcəkmi?

Məsələ ilə bağlı Sfera.az-a açıqlama verən Milli Məclisin deputatı Elşad Mirbəşiroğlunun sözlərinə görə, Rusiya Prezidenti Vladimir Putinin mayın 19-da verdiyi açıqlamada ABŞ-yə təşəkkürünü ifadə etməsi bu ölkənin birbaşa danışıqların baş tutmasında mühüm rol oynadığını göstərir. Eyni zamanda ABŞ Prezidenti də bu danışıqları yüksək qiymətləndirib.

“Bu da onu göstərir ki, Rusiya və ABŞ tərəfi müzakirələri müsbət qiymətləndirir və danışıqların davam etdirilməsində maraqlıdır. ABŞ üçün əsas hədəf, şübhəsiz ki, Rusiya ilə Ukrayna arasında sülhün təmin olunmasıdır. Bu baxımdan Donald Trampın fərdi diplomatik yanaşması və Rusiya rəhbərliyi ilə əvvəldən mövcud olan münasibətləri, onu bu cür vasitəçilik üçün daha uyğun fiqura çevirir”, – deyə deputat bildirib.

Elşad Mirbəşiroğlunun sözlərinə görə, Trampın praqmatik yanaşması onu bu danışıqlarda ABŞ üçün əlverişli seçimə çevirir:

"Co Bayden administrasiyası Avropa ölkələri ilə birlikdə Ukraynaya hərbi və siyasi dəstək göstərməklə, Ukraynanın Rusiya qarşısında dayana bilməsinə çalışırdı. Lakin bu yanaşma gözlənilən nəticəni vermədi.

Tramp isə daha çox real vəziyyətə əsaslanır və hesab edir ki, Rusiya-Ukrayna müharibəsində yeni reallıqlar formalaşıb. Bu reallıqlar fonunda o, tərəflər arasında sülhün əldə olunması üçün mövcud imkanlar daxilində kompromisli həll yolları axtarmağa çalışır”.

Deputat əlavə edib ki, artıq NATO rəhbərliyi də Ukraynanın əvvəlki sərhədlərlə sülhə qayıtmasının mümkün olmadığını etiraf edir:

“Bu, əslində ABŞ-nin də mövqeyidir. Çünki NATO-da əsas söz sahibi ABŞ-dir. ABŞ hazırda Avropa ölkələrini də bu reallıqla barışmağa sövq edir. Bununla yanaşı, ABŞ Rusiya ilə münasibətlərin normallaşmasını da vacib hesab edir”.

Elşad Mirbəşiroğlu Donald Trampın bu kontekstdə ABŞ-Rusiya münasibətlərinin normallaşdırılması üçün sülh sazişinə nail olmaqda maraqlı olduğunu qeyd edib:

“Tramp dəfələrlə bəyan edib ki, Rusiya və Ukrayna arasında sülh sazişi imzalanarsa, ABŞ ilə Rusiya arasında ticarət əlaqələri bərpa olunacaq və Rusiyaya qarşı tətbiq edilən sanksiyalar da aradan qalxacaq. Bu isə onu göstərir ki, Vaşinqtonda yaxın vaxtlarda Rusiya-Ukrayna arasında razılaşmanın əldə olunacağına dair formalaşmış təsəvvür var.

Bu, ABŞ-nin Ukrayna ərazisində hərbi əməliyyatların yaxın müddətdə dayanacağına inamının göstəricisidir. Hazırda ABŞ və Rusiya arasında gedən dialoq və tərəflərin münasibətləri, bu iki ölkə arasında proseslərə dair razılaşma əldə olunması üçün müəyyən imkanlar yaradır”.

E.Mirbəşiroğlu sonda qeyd edib ki, Trampın liderliyi dönəmində ABŞ, Rusiya ilə münasibətləri daha çevik və realist yanaşma ilə nizamlaya bilər. Bu isə həm qlobal təhlükəsizliyin təmin olunması, həm də Rusiya-Ukrayna müharibəsinin sonlandırılması baxımından əhəmiyyətli olacaq.

Bəsti Rəfizadə
Sfera.az

Tramp Rusiya-Ukrayna sülhündə niyə israr edir? - Deputatdan AÇIQLAMA