ABŞ-nin Dövlət katibi Antoni Blinken İran və "Hizbullah" hərəkatının yaxın 24 saat ərzində İsrailə hücum edəcəyini bəyan edib.

Sfera.az "Axios" nəşrinə istinadən xəbər verir ki, A.Blinken bunu Böyük Yeddilik Qrupu (G7) ölkələrinin xarici işlər nazirlərinə deyib. Birləşmiş Ştatlar rəsmisi hücumun gücünü minimuma endirmək üçün G7 ölkələrini İran və "Hizbullah"a diplomatik təzyiq göstərməyə çağırıb.

Blinken ABŞ-nin İran və "Hizbullah"ın hər ikisinin qisas alacağına inandığını vurğulayıb.

Qeyd edək ki, iyulun 31-də Fələstin HƏMAS hərəkatı Haniyənin İran prezidenti Məsud Pezeşkianın andiçmə mərasimində iştirak etdiyi Tehrandakı iqamətgahına İsrailin endirdiyi zərbə nəticəsində öldüyünü bildirib. Al Hadath telekanalı Haniyənin birbaşa raket zərbəsi nəticəsində öldürüldüyünü bildirib. HƏMAS-ın siyasi bürosunun rəis müavini Musa Əbu Mərzuk Haniyənin öldürülməsinin cavabsız qalmayacağına söz verib.

Firuzə Əliyeva