Tərk edilmiş 127 milyon dollar dəyərindəki evlərdə vəhşi heyvanlar məskunlaşıb - FOTOLAR
Klipstoun şəhərində (Böyük Britaniya) heç kimin yaşamadığı uçuq-sökük yaşayış kompleksi vəhşi heyvanların məskəninə çevrilib. Bu gün bu ərazidə heç bir əlavə dekorasiya olmadan apokalipsis haqqında filmlər çəkilə bilər.
Sfera.az bildirir ki, ötən il inşaatçı “Sherwood Oak Homes” təxminən 127 milyon dollarlıq layihədən imtina edərək müflis olduğunu elan edib. 2023-cü ilin oktyabrına qədər şirkət massivdəki 313 evdən yalnız 30-nun tikintisini başa çatdıra bilib.
Yerli sakinlər bildirirlər ki, kompleksi indi nüvə silahının sınaqları üçün ideal yer adlandırmaq olar. Yaxınlıqda yaşayan kişilərdən biri oradakı mənzərələri məşhur post-apokaliptik televiziya serialı ilə müqayisə edir.
“Artıq bir neçə aydır ki, biz belə yaşayırıq, orada vəhşi heyvanlar var. Düzünü desəm, bu, kütləvi qırğın silahları üçün sınaq meydançasına bənzəyir”.
(Sherwood Oak Homes ötən il öz layihəsini taleyin ümidinə buraxaraq müflis olub).
Təqaüdçü dispetçer olan 76 yaşlı nənə də artıq danışılanlarla razılaşır. O, yarımçıq tikintini biabırçılıq adlandırıb.
"Evlər gözəldir, buna görə də belə olması ayıbdır. İndi orada iki maral, tülkü və digər heyvanlar yaşayır" - deyə o əlavə edir.
“Clipstone”da bir neçə torpaq sahəsi başqa bir şirkət tərəfindən alınıb, buna görə də tezliklə dəyişikliklər baş verə bilər.
Yeni inşaat şirkətinin direktoru Qaret Hankin:
"Biz öz brendimizi şəhərin bu hissəsinə gətirdiyimiz üçün çox şadıq. Bu, əlverişli şəraiti və şəhər mərkəzinə yaxın, bir neçə dəqiqəlik məsafədə yerləşən fantastik kənd yeridir”-deyə sevincini gizlətmir.
Bununla belə, insanlar kifayət qədər şübhə ilə yanaşırlar.
Adını açıqlamayan yerli sakin:
“İnanmıram ki, kimsə burada yaşamaq üçün yarım milyon funt sterlinq xərcləsin, amma yaşayıb görəcəyik" - deyə bildirib.
Xanım
Sfera.az
