Müəllimlikdən Prezidentliyə, deputatlığa: Onlar da müəllim olub...
Bu gün Azərbaycanda müəllimlərin peşə bayramı – 5 Oktyabr, Beynəlxalq Müəllimlər Günü qeyd olunur.
Müəllimlik çoxları üçün ömürlük peşə olsa da, Azərbaycanda bu sahədən siyasətə və dövlət idarəçiliyinə keçən kifayət qədər tanınmış şəxslər də var.
Sfera.az onların arasında Prezidentdən Milli Məclisin rəhbərliyinə və deputatlara qədər uzanan maraqlı siyahını araşdırıb.
Prezident də vaxtilə müəllim işləyib
Azərbaycanda müəllimlik fəaliyyəti göstərmiş ən yüksək vəzifəli şəxslərdən biri Prezident İlham Əliyevdir. Dövlət başçısının rəsmi bioqrafiyasına əsasən, İlham Əliyev 1977-1982-ci illərdə Moskva Dövlət Beynəlxalq Münasibətlər İnstitutunda təhsil alıb, daha sonra həmin institutun aspiranturasına daxil olub. 1985-ci ildə dissertasiya müdafiə edərək tarix elmləri namizədi elmi dərəcəsi alıb və həmin ildən 1990-cı ilə qədər institutda müəllim işləyib. İlham Əliyev özü də çıxışlarından birində bildirib ki, institutda dərs deməyə başlayanda 23 yaşı olub və 1990-cı ilə qədər müəllimlik fəaliyyətini davam etdirib. Beləliklə, sonradan dövlət başçısı olan İlham Əliyevin əmək fəaliyyətinin ilk mərhələlərindən biri məhz müəllimlik olub.
Milli Məclisin sədri də müəllimlikdən gəlib
Müəllimlikdən yüksək dövlət vəzifəsinə qədər uzanan digər nümunə Milli Məclisin sədri Sahibə Qafarovadır. 1978-1981-ci illərdə Şəmkir şəhərində orta məktəblərdə müəllim işləyib. 1981-2020-ci illərdə Azərbaycan Pedaqoji Rus dili və Ədəbiyyatı İnstitutunun (Bakı Slavyan Universiteti) laborantı, müəllimi, baş müəllimi, dosenti, professoru, Qərb Universitetinin Qərb dilləri fakültəsinin dekanı, Bakı Slavyan Universitetinin Avropa dilləri kafedrasının müdiri vəzifələrində çalışıb. O, elmi fəaliyyətlə yanaşı, pedaqoji sahədə də çalışıb və professor elmi adını alıb.
Musa Qasımlı – orta məktəbdən parlament rəhbərliyinə
Milli Məclis sədrinin müavini Musa Qasımlının da əmək fəaliyyətində müəllimlik xüsusi yer tutur. Parlamentin rəsmi məlumatına görə, Qasımlı 1979-1982-ci illərdə Yardımlı rayonunun orta məktəblərində müəllim işləyib. Daha sonra Azərbaycan Dövlət Universitetində müəllim, baş müəllim və dosent kimi fəaliyyət göstərib, professor elmi adına yiyələnib. O, bir neçə çağırış Milli Məclisin deputatı olub və 2024-cü ildən parlament sədrinin müavinidir.
Səməd Seyidov – müəllimlikdən universitet rəhbərliyinə, oradan parlamentə
Milli Məclisin deputatı Səməd Seyidovun da fəaliyyəti təhsil və pedaqogika ilə sıx bağlı olub. Rəsmi bioqrafiyasına görə, o, 1986-cı ildən Azərbaycan Pedaqoji Xarici Dillər İnstitutunda çalışıb, 1990-cı ildən müəllim və baş müəllim, 1994-cü ildən isə tədris işləri üzrə prorektor vəzifəsində fəaliyyət göstərib. 2000-ci ildən Azərbaycan Dövlət Dillər Universitetinin rektoru olub. Eyni zamanda Milli Məclisin deputatı kimi fəaliyyət göstərib.
Səyyad Aran – ixtisası birbaşa müəllimlikdir
Hazırkı deputatlardan Səyyad Aranın da ilk ixtisası pedaqoji sahə ilə bağlıdır. Milli Məclisin rəsmi profilində onun Azərbaycan Dövlət Pedaqoji İnstitutunu bitirdiyi və ixtisasının “orta məktəbdə Azərbaycan dili və ədəbiyyat müəllimi” olduğu qeyd edilir. Daha sonra hüquq təhsili də alan Səyyad Aran 2024-cü ildə Milli Məclisə deputat seçilib.
Müəllimlikdən siyasətə keçənlər təkcə bugünkü siyasətçilərlə məhdudlaşmır Parlamentin əvvəlki çağırışlarında da pedaqoji fəaliyyətdən siyasətə keçən çoxsaylı şəxslər olub. Məsələn, tarixçi Yaqub Mahmudov 1956-cı ildən Balakən rayonunun Sarıbulaq kənd orta məktəbində müəllim işləyib, daha sonra Azərbaycan Dövlət Pedaqoji İnstitutunda və Bakı Dövlət Universitetində pedaqoji fəaliyyət göstərib. O, Milli Məclisin II və III çağırışlarında deputat olub. Mübariz Qurbanlı 1978-ci ildən Şəmkir rayonunda orta məktəb müəllimi, 1985-ci ildən isə Azərbaycan Dövlət Mədəniyyət və İncəsənət Universitetində müəllim, dosent və kafedra müdiri kimi çalışıb. Daha sonra Milli Məclisin deputatı olub. Keçmiş deputat İqbal Ağazadə də 1994-cü ildən Bakı Dövlət Universitetində, 1995-1999-cu illərdə isə Bakı Asiya Universitetində müəllim işləyib. Eyni zamanda keçmiş deputat Yevda Abramov Azərbaycan Dövlət Pedaqoji İnstitutunun tarix fakültəsini bitirib, 1971-ci ildən Quba rayonunda orta məktəbdə müəllim və direktor müavini kimi çalışıb.
Müəllimlikdən dövlət idarəçiliyinə uzanan yol Bu nümunələr göstərir ki, müəllimlik təcrübəsi Azərbaycanın siyasi və ictimai həyatında müxtəlif səviyyələrdə təmsil olunub. Bəzi şəxslər məktəbdə müəllim kimi fəaliyyətə başlayıb, daha sonra universitetlərdə professor və rektor olub, ardınca parlamentə gəlib. Bəziləri isə pedaqoji fəaliyyətindən sonra birbaşa dövlət idarəçiliyində və siyasətdə müxtəlif vəzifələr tutub. Müəllimliklə siyasət arasında başqa bir ortaq cəhət də var: hər iki sahədə insanlarla ünsiyyət, fikri izah etmək və auditoriya qarşısında çıxış etmək mühüm rol oynayır.
5 Oktyabr - Müəllimlər Günü isə bir daha göstərir ki, müəllimin təsiri yalnız dərs dediyi sinif otağı ilə məhdudlaşmır. Bu gün ölkənin siyasi, elmi və ictimai həyatında yer alan bir sıra şəxslərin peşə yolunun başlanğıcında məhz müəllimlik dayanıb.
Firuzə Əliyeva
