“İzmir Residence” sakinləri “İzmir Restoran”dan şikayətçidirlər – "Mitinq etmək istəyirik"
Yasamal rayonunda yerləşən “İzmir Residence”də yaşayan sakinlər uzun müddətdir “İzmir Restoran”ın Yay Terrasındakı səs-küylü fəaliyyətindən narazılıq edirlər.
Sfera.az xəbər verir ki, vətəndaşlar restoranın fəaliyyəti ilə bağlı polisə, prokurorluğa, Ekologiya və Təbii Sərvətlər Nazirliyinə, eləcə də digər icra qurumlarına dəfələrlə şikayətlər ediblər.
Sakinlərin sözlərinə görə, restoranın fəaliyyəti həm “Ətraf mühitə və insan sağlamlığına mənfi təsir göstərən vibrasiya və səs-küy çirklənmələri normaları”na, həm də müvafiq məhkəmə qərarına ziddir.
2024-cü ildə Yasamal Rayon Məhkəməsinin qəbul etdiyi qətnaməyə əsasən, restoran səhər saat 07:00-dan axşam 23:00-dək maksimum 60 desibel səs səviyyəsini saxlamağa, 23:00-dan sonra isə musiqi fəaliyyətini tam dayandırmağa məcbur edilib.
Lakin sakinlərin iddiasına görə, “İzmir Restoran” bu qərarı icra etmir və hətta apellyasiya şikayəti verib. Ekologiya və Təbii Sərvətlər Nazirliyinin Xəzər Kompleks Ekoloji Monitorinq İdarəsinin 2025-ci ildə apardığı yoxlamalar zamanı da normadan artıq səs-küy və atmosferə buraxılan dəm qazlarının mövcudluğu rəsmi şəkildə təsdiqlənib.
Yasamal Rayon Prokurorluğu da sakinlərin şikayətlərinə cavab verib. Şikayətçilər bildirirlər ki, yaranmış vəziyyət ailələrin, uşaqların, xüsusən südəmər körpələrin istirahətinə, şagirdlərin dərsə hazırlaşmasına, yaşlı və xəstə insanların səhhətinə mənfi təsir göstərir. Onların sözlərinə görə, hətta İzmir Parkında istirahət edən vətəndaşlar belə səs-küydən əziyyət çəkirlər. Bütün bunları nəzərə alan “İzmir Residence” sakinləri artıq Bakı Şəhər İcra Hakimiyyətinə müraciət edərək, İzmir Parkında mitinq keçirmək üçün icazə istəyiblər. Hazırda həmin müraciətə cavab gözlənilir.
Məsələ ilə bağlı DİN-in Mətbuat Xidmətinin əməkdaşı, polis leytenantı Lumu İsrəfilli açıqlamasında bildirib ki, qeyd edilən məkanda dəfələrlə polis əməkdaşları tərəfindən profilaktik tədbirlər həyata keçirilib vətəndaşları narahat edən hallar aradan qaldırılıb:
“Qeyd edək ki, polis əməkdaşları tərəfindən məişət səs-küyünə qarşı müvafiq mübarizə tədbirləri mütəmadi olaraq həyata keçirilir. Mənzillərdə, yaşayış evlərinin girişlərində və həyətlərində, küçələrdə, istirahət yerlərində, avtomobillərdə və digər ictimai yerlərdə gecə saat 00:00-dan səhər 7-dək səs-küy salan, məişət səs-küyünə qarşı mübarizə tələblərini müxtəlif üsullarla pozan şəxslər polis əməkdaşları tərəfindən müəyyən edilərək barələrində qanunamüvafiq tədbirlərin görülməsi təmin olunur. Nəzərinizə çatdıraq ki, məişət səs-küyünə qarşı mübarizə qaydalarının pozulması İnzibati Xətalar Məcəlləsinin müvafiq maddəsi ilə tənzimlənir”.
Sfera.az məsələ ilə bağlı Bakı Şəhər İcra Hakimiyyəti və Yasamal Rayon İcra Hakimiyətinə yaranmış narazılıqla bağlı sorğu ünvanlayıb. Hazırda müraciətə cavab gözlənilir.
Qeyd edək ki, “İzmir Residence” sakinlərinin üzləşdiyi vəziyyət media orqanlarında, o cümlədən televiziya kanallarında bir neçə dəfə işıqlandırılıb. Televiziya kanallarının hazırladığı verilişlərdə sakinlərin hamısı üzləşdikləri acınacaqlı vəziyyətlə bağlı şikayətlərini çatıdırıblar. Sakinlər açıqlamalarında dəfələrlə məhkəmə və icra qurumlarına şikayət etdiklərini, yaranmış vəziyyəti mübahisələndirdiklərini bildiriblər. Bütün dövlət qurumları “İzmir Residence” sakinlərinin bu şikayətlərində haqlı olduğuna dair rəy və qərarlar versələr də “İzmir Restoran"ın narazılıq yaradan fəaliyyətində hələ də dəyişiklik görünmür. Müvafiq məhkəmə qərarlarının və rəylərin olmasına baxmayaraq Bakı Şəhər İcra Hakimiyyəti və digər cavabdeh qurumlar məsələnin həllini yubadırlar.
Bəsti Rəfizadə
Sfera.az
