Yeni elmi araşdırmalar musiqinin təsir dairəsini radikal şəkildə genişləndirir.

Sfera.az xəbər verir ki, artıq musiqinin təkcə emosional vəziyyətə deyil, insan hüceyrələrinin davranışına və gen ifadəsinə də təsir etdiyi ortaya çıxıb. Bu nəticələr MIT (ABŞ) və Tokyo Universiteti (Yaponiya) alimlərinin birgə apardığı son laboratoriya tədqiqatlarında üzə çıxıb.

Tədqiqatda müxtəlif musiqi janrlarının hüceyrə səviyyəsində təsiri izlənib. Klassik musiqi xüsusilə Mozart və Bax (Johann Sebastian Bach) hüceyrə bölünməsini və regenerasiya proseslərini sürətləndirib. Digər tərəfdən, aqressiv və disharmonik səs dalğaları hüceyrə divarlarında mikrozədələnmələr və stress hormonlarının yüksəlməsi ilə nəticələnib.

Alimlərin fikrincə, səs dalğaları hüceyrə membranlarında fiziki vibrasiya yaradır. Bu vibrasiya hüceyrənin daxili kimyəvi balansına təsir edir, nəticədə gen ifadəsi və zülal sintezi dəyişə bilər.

Bəzi alternativ tibb mütəxəssisləri bu nəticələri “səslə müalicə” (sound therapy) yanaşması ilə əlaqələndirir. Onların fikrincə, 528 Hz tezliyindəki musiqi DNT-nin strukturuna müsbət təsir göstərərək hüceyrə bərpasını sürətləndirə bilər. Elm dairələri bu iddialara ehtiyatla yanaşsa da, mövzu üzərində geniş tədqiqatlar davam edir.

Əvvəllər musiqi terapiyası yalnız emosional rahatlıq, stressin azaldılması və psixoloji balansın bərpası üçün istifadə olunurdusa, yeni tapıntılar onu bioloji və genetik səviyyədə təsir göstərən amil kimi gündəmə gətirib.

MIT biofiziki Elena Moriyama bildirir ki: “Bu tapıntılar musiqini gələcəyin dərmansız müalicə vasitəsi kimi qiymətləndirməyə əsas verir. Hüceyrə səviyyəsində belə təsir gözlənilməz olsa da, çox ümidvericidir”.

Musiqi sadəcə ruhun deyil, bədənin də qidasına çevrilməkdədir. Yeni araşdırmalar musiqinin genetik tənzimləmədə, hüceyrə bərpasında və hətta xroniki xəstəliklərin idarəsində yeni imkanlar aça biləcəyini göstərir. Gələcəkdə tibb və sənətin birləşəcəyi yeni bir sahənin bioakustik terapiyanın doğulacağı proqnozlaşdırılır.

Fidan Hacızadə
Sfera.az

Musiqidən müalicə kimi istifadə olunacaq