Müasir elmi araşdırmalar göstərir ki, insanın psixoloji və fiziki sağlamlığı bir-biri ilə sıx əlaqəlidir. Bu baxımdan cinsi münasibətlərin təkcə emosional yaxınlıq və münasibətlərə deyil, həm də ümumi həyat keyfiyyətinə və uzunömürlülüyə təsiri tez-tez müzakirə olunur.

Bir çox mənbələrdə cinsi münasibətlərin stressi azaltdığı, yuxu keyfiyyətini yaxşılaşdırdığı və xoşbəxtlik hormonlarının səviyyəsini artırdığı qeyd edilir. Bu isə birbaşa psixoloji rifah halına təsir edə bilər.

Cinsi münasibətin insanın emosional və psixoloji sağlamlığına təsiri necədir və bu, uzunömürlülüklə necə əlaqələndirilə bilər?

Sfera.az-a açıqlama verən psixoloq Nizami Orucov cinsi münasibətin insanın yalnız fiziki deyil, eyni zamanda emosional və psixoloji rifahı üçün də vacib olduğunu bildirib.

O qeyd edib ki, bu yaxınlıq sevgi, bağlılıq və güvən hisslərini gücləndirməklə yanaşı, daxili tarazlığı qorumağa kömək edir:

“Cinsi yaxınlıq zamanı beyində ifraz olunan hormonlar – oksitosin, endorfin və serotonin stressi azaldır, xoşbəxtlik hissini artırır və yuxu keyfiyyətini yaxşılaşdırır. Bu, insanın gündəlik emosional vəziyyətinə və həyat enerjisinə birbaşa təsir göstərir. Sağlam münasibət içində yaşanan cinsi həyat insanın özünə inamını artırır, bədənini və hisslərini qəbul etməsinə, eyni zamanda sevilən biri olduğunu hiss etməsinə səbəb olur”.

Psixoloq müntəzəm və sağlam cinsi həyat ürək-damar sistemi, immunitet və ümumi həyat keyfiyyəti üçün də müsbət təsir daşıdığını vurğulayıb.

N.Orucov qeyd edib ki, bu isə insanın özünü daha enerjili və balanslı hiss etməsinə, uzunmüddətli sağlamlığına da dəstək olur:

“Cinsi münasibətlər sadəcə fiziki yaxınlıq deyil, həm də emosional bağ və psixoloji rahatlıq üçün vacib bir ehtiyacdır. Əsas olan bu münasibətlərin qarşılıqlı razılıq, hörmət və dəyərlə qurulmasıdır”.

Fidan Hacızadə
Sfera.az

Cinsi münasibət ömrü uzadır? - Psixoloqdan AÇIQLAMA