Birgə Monitorinq Mərkəzindəki türk hərbçilər niyə susur? - “Mütləq reaksiya verilməli idi...”
12:06 / 16.07.2021
1523
"Atəşkəsin pozulması uzun müddət davam etmir,
10-15 dəqiqə çəkir. Həmin anı tutmaq, fiksə etmək məsələsində Monitorinq Mərkəzinin
problemləri ola bilər”.
Bu sözləri Sfera.az-a açıqlamasında son günlər
ermənilərin dəfələrlə Şuşa və Ağdam istiqamətində atəşkəsi pozmasına rəğmən, elə
Ağdamın özündə fəaliyyət göstərən Rusiya - Türkiyə Birgə Monitorinq Mərkəzinin
məsələyə hər hansı reaksiya bildirməməsinin səbəblərindən danışarkən, politoloq
Qabil Hüseynli deyib.
Həmsöhbətimiz hesab edir ki, baş verən
insidentlərlə bağlı mərkəzin əlində audiomateriallar olmadığından qurum olayla
bağlı hər hansı bir reaksiya nümayiş etdirmir:
"Ermənilərin son həyasızlığı Fransa və
Rusiyanın himayəsilə həyata keçirilib. Birgə Monitorinq Mərkəzində Türkiyədən
olan hərbçilər sadəcə sırf vizual müşahidələrlə məşğuldur. Bildiyimə görə,
Qarabağda baş verən ayrı-ayrı insidentlərə isə Monitorinq Mərkəzindəki ruslar
baxır, onlar cavabdehdirlər. Toqquşmalarla bağlı mərkəzdə yəqin ki,
audiomateriallar olmayıb.
Bu materialları qurum pilotsuz uçan aparatlar vasitəsilə
əldə edir. Hesab edirəm ki, son insidentləri məhz qeydə ala bilmədiklərindən, əllərində
audiomateriallar olmaması səbəbindən mərkəz atəşkəsin pozulmasına belə
susqunluq nümayiş etdirir. Rusiya ilə danışıqlar olub ki, Laçın koridoruna rus
sülhməramlıları ilə birlikdə Türkiyədən olan patrul dəstələri də nəzarət etməli
idilər. Amma Moskva buna imkan vermədi. Baş verən hadisələrlə bağlı məlumat
toplamışdılarsa, mərkəz mütləq reaksiya verməli idi. Bu mənada nədən reaksiya
vermədiklərini yozmaqda çətinlik çəkirəm”.