Əmlak Məsələləri Dövlət Komitəsi jurnalistlərin mülkiyyət hüquqlarının səmərəli təmin olunması məqsədilə “Kütləvi çıxarış” kampaniyasını təşkil edib.

Sfera.az xəbər verir ki, qafqazinfo-ya daxil olan məlumata görə, bu binada mənzil sahibi olan 100-dən çox jurnalistə bilavasitə onların ünvanında kütləvi qaydada dövlət reyestrindən çıxarışlar təqdim olunub. Tədbirdə Daşınmaz Əmlakın Dövlət Reyestri Xidmətinin rəisi Hikmət Mustafayev, Azərbaycan Mətbuat Şurasının sədri Əflatun Amaşov, Kütləvi İnformasiya Vasitələrinə Dövlət Dəstəyi Fondunun rəhbəri Vüqar Səfərli iştirak edib.

Daşınmaz Əmlakın Dövlət Reyestri Xidmətinin rəisi Hikmət Mustafayev bildirib ki, ölkə rəhbərliyi tərəfindən daim Azərbaycanda informasiya azadlığının və azad mətbuatın təmin olunması, Kütləvi İnformasiya Vasitələrinə dəstəyin göstərilməsi diqqət mərkəzində saxlanılır.

Dövlət başçısının mülkiyyət münasibətlərinin tənzimlənməsində vahid idarəçilik, xidmətlərdə operativliyin, rahatlığın və şəffaflığın artırılması barədə tapşırıqlarına uyğun olaraq komitə tərəfindən müntəzəm tədbirlər həyata etdirilir.

Daşınmaz əmlakın qeydiyyatında və torpaq məsələlərində “bir pəncərə” prinsipinin tətbiqi, 31 elektron, 3 SMS və 2 onlayn xidmətin istifadəyə verilməsi, qeydiyyat prosedurlarının sadələşdirilməsi və qeydiyyat müddətinin qısaldılması belə tədbirlərə nümunədir.

Qeyd edək ki, Əmlak Məsələləri Dövlət Komitəsi ötən ildən başlayaraq daşınmaz əmlak və torpaq sahiblərinə ilkin mülkiyyət sənədləri əsasında birbaşa ünvanlarda kütləvi qaydada çıxarışların verilməsi kampaniyasını həyata keçirir.

Kampaniya həm paytaxtda, həm də regionlarda paralel olaraq təşkil olunur. Son bir neçə həftədə artıq Bakıda yeni inşa edilmiş çoxmərtəbəli binalardakı mənzil sahibləri də kampaniyaya cəlb olunub.