Estoniya beynəlxalq PISA qiymətləndirməsində Finlandiyanı geridə qoyaraq təhsildə Avropanın ən yaxşı ölkəsi olub. 1,4 milyon əhalisi olan Baltikyanı ölkə, riyaziyyat, təbiət elmləri və yaradıcı düşüncə sahələrində Avropada birinci, oxu bacarığı sahəsində isə ikinci yeri tutub.

Sfera.az xarici mediaya istinadən xəbər verir ki, ekspertlər Estoniyanın bu uğurunu ölkənin rəqəmsal texnologiyaları təhsilə uğurla inteqrasiya etməsi ilə əlaqələndirir.

İqtisadi Əməkdaşlıq və İnkişaf Təşkilatının (OECD) 2022-ci ildə keçirdiyi PISA proqramında Estoniyanın nəticələri bir çox inkişaf etmiş ölkələri geridə qoyub.

Maraqlıdır ki, bir çox Avropa ölkəsində dərslərdə mobil telefonlardan istifadəyə məhdudiyyət qoyulduğu halda, Estoniyada müəllimlər şagirdləri telefonlarını öyrənmə vasitəsi kimi istifadə etməyə təşviq edirlər.

Estoniya hökuməti sentyabr ayından etibarən bütün şagirdlər üçün fərdi süni intellekt hesabları istifadəyə verəcəyini açıqlayıb. “AI Leap” adlı yeni milli proqram çərçivəsində 2027-ci ilə qədər 58 min şagird və 5 min müəllimə süni intellekt alətləri pulsuz təqdim ediləcək. Layihənin məqsədi Estoniya məktəblərini süni intellekt üçün qabaqcıl sınaq mühitinə çevirməkdir.

“OpenAI” ilə aparılan lisenziya danışıqları nəticəsində Estoniya müəllimləri bu sahədə xüsusi təlimlər alacaq, dərslərdə isə rəqəmsal etika və öz-özünə öyrənmə bacarıqları əsas yer tutacaq.

Estoniyanın təhsil və elmi naziri Kristina Kallas bildirib ki, ölkədə texnologiyaya qarşı qorxu yoxdur və cəmiyyət rəqəmsal vasitələrin istifadəsinə açıqdır.

“Məktəblərdə mobil telefonlar qadağan olunmur, əksinə, tədrisin bir hissəsidir. Dürüst desəm, bununla bağlı heç bir problem eşitməmişəm”, – deyə nazir qeyd edib.
Nazir onu da əlavə edib ki, 16 yaşdan yuxarı Estoniya vətəndaşları seçkilərdə onlayn səs verə bildikləri üçün, şagirdlərə vətəndaşlıq məsuliyyətlərini yerinə yetirmək və siyasi maarifləndirmə üçün də telefonlardan istifadə etmələri tövsiyə olunur.

Ekspertlərə görə, Estoniyanın uğuru sübut edir ki, texnologiyanı təhsildən uzaqlaşdırmaq əvəzinə, onu düzgün istiqamətdə istifadə etməklə daha savadlı və hazırlıqlı nəsil yetişdirmək mümkündür.

Bəsti Rəfizadə
Sfera.az

Təhsildə Avropanın ən yaxşı ölkəsi seçilib