"Balaəli dekan, hətta kafedra müdiri ola bilər" - Təhsil ekspertindən AÇIQLAMA

Ötən gün meyxanaçı Balaəli "Xəbər-ətər" proqramında orta məktəbi bitirsə də, ali təhsil ala bilmədiyini, bununla belə dekan ola biləcəyini deyib.

"Təhsilsizəm, amma hansı universitetə getsəm, dekan işləyərəm", - o qeyd edib. Onun bu fikirləri gündəm olub.

Bununla bağlı Sfera.az-a açıqlama verən təhsil məsələləri üzrə ekspert Kamran Əsədov deyib ki, çoxları meyxanaçını qınasa da, qüvvədə olan qaydalar ali təhsili olmayan Balaəlinin dekan olmasına məhdudiyyət qoymur:

“Ancaq gərək o, dövlət təltifi alsın. Belə ki, 15.11.2017-ci il tarixli Ali təhsil müəssisələrində kafedra müdiri, dekan və dekan müavini vəzifələrinin tutulması qaydalarına görə,(1.6.4.) incəsənət, musiqi təmayüllü kafedraların müdiri və ya müvafiq fakültələrin dekanı vəzifəsini tutmaq üçün elmi dərəcəsi və adı olmayan, lakin həmin sahədə dövlət təltifləri olan şəxslər də iştirak edə bilərlər”.

Ekspert bildirib ki, yəni Balaəlinin ali təhsil almaması onun ali təhsil müəssisəsində dekan, hətta kafedra müdiri olmasına maneə olmur:

“Əgər o, əməkdar artist və ya digər dövlət təltifi alarsa, bu arzusunu da reallaşdıra bilər”.

Günay