Bu il keçid balları necə olacaq? - “200 bal toplayan bütün abituriyentlər...”
"Mart ayının 3-ü və 10-u keçirilən buraxılış imtahanlarından sonra 53 nəfərin 300 bal toplaması valideyin, şagird və abituriyentlər arasında ciddi ajiotaja səbəb olub. Ali məktəblərə qəbul olunmaq üçün elektron ərizə qəbulu dünən başa çatıb və ixtisas qrupları üzrə sənəd verənlərin sayı vəziyyətin təhlükəli olmadığını göstərib".
Sfera.az xəbər verir ki, bu barədə təhsil eksperti Kamran Əsədov bildirib.
“Belə ki, bu il I ixtisas qrupu üzrə 30134 abituriyent ərizə verib. Keçən il bu rəqəm 28864 nəfər idi ki, bu da 1274 nəfər artım deməkdir. Keçən il I ixtisas qrupu üzrə 18.386 plan yeri ayrılıb. I ixtisas qrupu üzrə 200-dən çox bal toplayan bütün abituriyetlər ali məktəbə qəbul ola biləcək. Keçən il bu 28864 nəfərdən 10882 nəfər 200-dən çox bal toplayıb. 2024-cü ildə II ixtisas qrupu üzrə 23950 abituriyent ərizə verib. Keçən il bu rəqəm 23171 nəfər idi ki, bu da 781 nəfər artım deməkdir. Keçən il I ixtisas qrupu üzrə 13.285 plan yeri ayrılıb. Nəticə etibarilə, II ixtisas qrupu üzrə 200-dən çox bal toplayan bütün abituriyetlər ali məktəbə qəbul ola biləcək. Keçən il 23171 nəfərdən cəmi 6803-nəfər 200-dən çox bal toplayıb. Bu il III ixtisas qrupu üzrə 25139 abituriyent ərizə verib. Keçən il bu rəqəm 22149 nəfər idi ki, bu da 2987 nəfər artım deməkdir. Belə bir nəticəyə gəlmək olar ki, III ixtisas qrupu üzrə də 200-dən çox bal toplayan bütün abituriyetlər ali məktəbə qəbul ola biləcək”.
Ekspert qeyd edib ki, bu il IV ixtisas qrupu üzrə 5925 abituriyent ərizə verib.
“Keçən il bu rəqəm 5574 nəfər idi ki, bu da 352 nəfər artım deməkdir. IV ixtisas qrupu üzrə 150-dən çox bal toplayan bütün abituriyetlər ali məktəbə qəbul ola biləcək. Bu il ali məktəblərin plan yeri artacaq. Yeni ali təhsil müəssisələri fəaliyyətə başlamasını nəzərə alsaq, bu il tələbə adını qazanmaq çətin olmayacaq”.
Ülkər Abdurahmanlı
