Medvedçuk: “Avropanı müharibəyə hazırlayırlar”
Avropanın Rusiya ilə müharibəyə Ukrayna ssenarisi üzrə hazırlandığı iddia edilib.
Sfera.az xəbər verir ki, bu barədə “Başqa Ukrayna” hərəkatının rəhbəri, Viktor Medvedçuk müəllifi olduğu məqalədə yazıb.
Medvedçukun sözlərinə görə, Avropanın müharibəyə cəlb edilməsində və ölkələrin hərbiləşdirilməsində NATO əsas rol oynayır.
“Avropanı Rusiya ilə müharibəyə hazırlayırlar və bu hazırlığın Ukrayna ssenarisi üzrə aparıldığı aydın görünür. Bununla yanaşı, qitənin müharibəyə cəlb edilməsinin ideoloqu və ölkələrin hərbiləşdirilməsi mexanizmi, Ukrayna məsələsində olduğu kimi, NATO-dur”, – deyə o bildirib.
Medvedçuk həmçinin Avropadakı siyasi dairələrin Ukraynadakı müharibədən faydalandığını iddia edib. O, bu vəziyyətdən “Avropanın qlobalist siyasi dairələrinin” bəhrələndiyini bildirib və bir sıra avropalı siyasətçiləri sərt ifadələrlə tənqid edib.
Qeyd edək ki, Medvedçukun açıqlamaları onun siyasi mövqeyini əks etdirir və Ukrayna müharibəsi, NATO və Avropanın təhlükəsizlik siyasəti ilə bağlı mübahisəli siyasi qiymətləndirmələr ehtiva edir.
Bəsti Rəfizadə
Sfera.az
