Azərbaycan nazirlərinin ixtisasları: Kim haranı bitirib?
Nazirlər kabinetində və digər yüksək dövlət postlarında təmsil olunan şəxslərin hansı sahə üzrə təhsil alması hər zaman maraq doğurur. Bəziləri iqtisadçı, bəziləri hüquqşünas, digərləri isə hərbi, tibbi və ya texniki ixtisas sahibləridir.
Sfera.az-ın araşdırmasına görə, Azərbaycanın bir sıra nazirləri hazırkı vəzifələrindən əvvəl tamamilə fərqli peşə istiqamətlərində formalaşıblar.
Baş nazir Əli Əsədov iqtisadçıdır. O, Moskva şəhərində iqtisadiyyat üzrə ali təhsil alıb və fəaliyyətinin böyük hissəsini iqtisadi idarəetmə sahəsinə həsr edib.
Daxili işlər naziri general-polkovnik Vilayət Eyvazovun əsas ixtisası hüquqşünaslıq və hüquq-mühafizə sahəsidir. O, DİN-in Polis Akademiyasını fərqlənmə diplomu ilə bitirib və karyerasına polis nəfəri kimi başlayaraq cinayət-axtarış və mütəşəkkil cinayətkarlıqla mübarizə istiqamətində çalışıb.
Keçmiş ekologiya və təbii sərvətlər naziri, hazırda iqlim məsələləri üzrə nümayəndə olan Muxtar Babayev isə politologiya, beynəlxalq hüquq və xarici iqtisadi əlaqələr üzrə təhsil alıb. O, uzun illər SOCAR-da rəhbər vəzifələrdə çalışıb, daha sonra ekologiya sahəsində dövlət idarəçiliyində yer alıb.
Energetika naziri Pərviz Şahbazov beynəlxalq iqtisadi əlaqələr üzrə mütəxəssisdir. O, uzun müddət diplomatiya sahəsində fəaliyyət göstərib və Azərbaycanın Almaniyadakı səfiri olub.
Ədliyyə naziri Fərid Əhmədov isə hüquqşünasdır. O, beynəlxalq hüquq və insan hüquqları sahəsində təhsil alıb, hüquq elmləri üzrə fəlsəfə doktorudur.
Fövqəladə hallar naziri Kəmaləddin Heydərovun ixtisası isə geologiyadır. O, Bakı Dövlət Universitetinin Geologiya fakültəsini bitirib.
Xarici işlər naziri Ceyhun Bayramov iki fərqli istiqamətdə, yəni iqtisadiyyat və hüquq sahəsi üzrə ali təhsil alıb. O, həm iqtisadçı, həm də hüquqşünas ixtisasına sahibdir.
İqtisadiyyat naziri Mikayıl Cabbarovun təhsil yolu isə hüquq və iqtisadiyyatla bağlıdır. O, beynəlxalq hüquq üzrə təhsil alıb, daha sonra iqtisadiyyat istiqamətində magistr dərəcəsi əldə edib.
Kənd təsərrüfatı naziri Məcnun Məmmədov iqtisadiyyat, mühasibat uçotu və audit üzrə təhsil alıb. Daha sonra biznes idarəçiliyi və aqrobiznes sahəsində ixtisaslaşıb.
Mədəniyyət naziri Adil Kərimli də hüquqşünasdır. O, hüquq fakültəsini fərqlənmə diplomu ilə bitirib, cinayət hüququ və kriminologiya sahəsində elmi fəaliyyət göstərib.
Müdafiə naziri general-polkovnik Zakir Həsənovun ixtisası isə hərbidir. O, Bakı Ali Ümumqoşun Komandirləri Məktəbini bitirib və uzun illər hərbi sahədə xidmət edib.
Rəqəmsal inkişaf və nəqliyyat naziri Rəşad Nəbiyev dövlət idarəçiliyi üzrə təhsil alıb. O, eyni zamanda iqtisadiyyat üzrə magistr dərəcəsinə sahibdir və uzun illər texnologiya sahəsində rəhbər vəzifələrdə çalışıb.
Elm və təhsil naziri Emin Əmrullayev siyasi elmlər və dövlət idarəçiliyi üzrə magistr təhsili alıb. O, ABŞ və Avropada da ixtisasartırma proqramlarında iştirak edib.
Beləliklə, dövlət idarəçiliyində təmsil olunan şəxslərin arasında hüquqşünaslardan iqtisadçılara, hərbçilərdən alimlərə qədər müxtəlif peşə sahibləri yer alır.
Bəsti Rəfizadə