Kremlin əsas təbliğatçılarından sayılan və Rusiya dövlət televiziyasının aparıcı siması olan Vladimir Solovyov efirdə növbəti dəfə Azərbaycanı təhdid edən bəyanatlar səsləndirib. O, Ermənistanı dəstəkləyən çıxışları ilə tanınan Marqarita Simonyan və Semyon Baqdasarovun iştirakı ilə yayımlanan proqramda Prezident İlham Əliyevin Xankəndidəki son çıxışına qarşı aqressiv və təxribatçı ritorika nümayiş etdirib.

Məsələ ilə bağlı Sfera.az-a açıqlama verən politoloq Züriyə Qarayevanın fikrincə, bu tip çıxışlar sadəcə şəxsi mövqe deyil, Kremlin informasiya müharibəsində istifadə etdiyi alətlərdən biri ola bilər:

“Solovyovun səsləndirdiyi fikirlər təkcə təbliğat xarakteri daşımır. O, Kremlin media üzərindən yaydığı dolaylı mesajların daşıyıcısıdır. Əsas məqsəd Azərbaycan ictimaiyyətinə və rəhbərliyinə psixoloji və informasiya təzyiqi göstərməkdir. Proqramda Simonyan və Baqdasarov kimi açıq ermənipərəst fiqurların da iştirakı bu ritorikanın koordinasiyalı kampaniyanın bir hissəsi olduğunu göstərir”.

Politoloq vurğuladı ki, Rusiya tez-tez rəsmi bəyanatlar vermədən, məhz media fiqurları vasitəsilə öz narazılıqlarını çatdırmağa çalışır:

“Solovyovun çıxışı, ehtimal ki, Moskvanın Azərbaycana münasibətdə bəzi narazılıqlarının bir formasıdır. Kreml rəsmi kanallardan çox, bu kimi media fiqurları vasitəsilə "qırmızı xətt"lərini çatdırmağı üstün tutur. Solovyovun ritorikası Kremlin rəsmi mövqeyini tam əks etdirməsə də, Rusiya daxilində və Ermənistandakı revanşist qüvvələrə verilmiş mesaj xarakteri daşıyır”.

Ekspert xəbərdarlıq edir ki, belə təbliğat kampaniyaları Azərbaycan cəmiyyətində Rusiyaya olan etimadı daha da zəiflədə bilər:

"Xüsusilə Qarabağda suverenliyin bərpa edildiyi bir dövrdə bu tip ritorika regiondakı sabitliyi pozmaq potensialına malikdir. Əgər bu cür təhdidedici ritorika davam edərsə və rəsmi Moskva buna susqun münasibət göstərərsə, bu, Azərbaycan ictimaiyyətində ciddi narahatlığa səbəb olacaq".

Z.Qarayeva hesab edir ki, bu ritorika eyni zamanda Ermənistanla münasibətlərdə yeni siyasi balansların formalaşmaqda olduğunu göstərir və Kremlin Cənubi Qafqazda zəifləyən təsirini informasiya müharibəsi ilə kompensasiya etmək cəhdidir.

Azərbaycan necə reaksiya verməlidir?

Politoloqun fikrincə, bu kimi çağırışlara qarşı Azərbaycan diplomatik kanallar vasitəsilə prinsipial mövqe nümayiş etdirməlidir:

“Solovyov və onun kimilərin ritorikası nə qədər şəxsi xarakter daşısa da, arxasında sistemli informasiya təzyiqi dayandığı üçün bu hallar ciddi şəkildə izlənilməli və cavablandırılmalıdır. Azərbaycan tərəfi bu kimi çıxışlara təmkinli, lakin qətiyyətli reaksiya verərək, həm daxildə, həm də beynəlxalq müstəvidə öz suverenliyini və mövqeyini müdafiə etməlidir”.

Bəsti Rəfizadə
Sfera.az

Solovyovun Azərbaycanla bağlı ritorikası – “Bu, informasiya təzyiqidir”