İran raket proqramını genişləndirməkdə davam edir. Ölkə müxtəlif məqsədlər üçün raketlərin istehsalını artırmağı planlaşdırır. Bununla yanaşı, İran Çindən döyüş təyyarələri və hava hücumundan müdafiə sistemləri əldə etməyi nəzərdə tutur. Bütün bunlar Tehranın hərbi gücünü artırmaq istiqamətində atdığı addımlardır.

İranın silahlanma siyasəti isə İsrail üçün yeni və ciddi bir təhdid kimi qiymətləndirilir. Bu səbəbdən yenidən İsraillə qarşıdurma ehtimalının olduğu bildirilir.

Sfera.az-a bu barədə açıqlama verən politoloq Elçin Xalidbəyli hazırda Yaxın Şərqdə baş verən proseslərə əsasən ABŞ-nin qərarverici mövqedə olduğunu deyib.

Onun sözlərinə görə, İranın hərbi gücünü artırmasına isə böyük ehtimalla Vaşinqtondan reaksiya veriləcək:

“İsrail son dövrlər hər nə qədər fəallaşsa və müstəqil şəkildə əməliyyatlar həyata keçirməyə cəhd etsə də, nəticə etibarilə Ağ Evin mövqeyi həm İsrail, həm də region üçün həlledici əhəmiyyət daşıyır. Hazırkı mərhələdə ABŞ Yaxın Şərqdə yeni bir münaqişənin yaranmasında maraqlı görünmür. Ağ Evdə hesab edilir ki, İranla bağlı mövcud problemlər diplomatik və siyasi yollarla həll oluna bilər. Bu səbəbdən Tramp administrasiyası hələlik İranla ziddiyyətlərin aradan qaldırılmasında hərbi vasitələrin tətbiqinə müsbət yanaşmır”.

Politoloq hazırda ABŞ-la İran arasında nüvə proqramının ləğvinə dair danışıqların növbəti mərhələsinin başlanması istiqamətində məsləhətləşmələrin aparıldığını qeyd edib.

O əlavə edib ki, görüşün yeri və gündəliyinin müəyyənləşdirilməsi üçün səylər göstərilir:

“İsrail isə İranın hərbi gücünün ciddi şəkildə artmasından narahat olduğunu açıq şəkildə bəyan edir. Lakin bu məsələdə Tramp administrasiyasının mövqeyi həlledici rol oynayacaq. Böyük ehtimalla, İranla bağlı proseslərin hansı istiqamətdə inkişaf edəcəyi ABŞ-nin mövqeyi dəqiqləşdikdən sonra tam aydın olacaq”.

Fidan Hacızadə
Sfera.az

İran-İsrail qarşıdurması yenidən başlayır? - AÇIQLAMA