"Əməliyyat" adı ilə qətliam - Rusiyanın qanunsuz ƏMƏLLƏRİ

Xəbər verdiyimiz kimi, iyunun 27-də Rusiyanın Yekaterinburq şəhərində baş verən hadisə azərbaycanlı miqrantlara qarşı sistemli ayrı-seçkiliyin və zorakılığın daha bir bariz nümunəsinə çevrildi.

Hüquq-mühafizə orqanlarının keçirdiyi xüsusi əməliyyat nəticəsində Ziyəddin və Hüseyn Səfərov qardaşları amansızlıqla döyülərək öldürülüb. Onlarla azərbaycanlı saxlanılıb, bəziləri işgəncəyə məruz qalıb. Əməliyyat zamanı evlərə zorla daxil olunması, qadın və uşaqların da psixoloji təzyiqlə üzləşməsi böyük ictimai narazılıq doğurub.

Hadisə ilə bağlı Azərbaycan Xarici İşlər Nazirliyi dərhal hərəkətə keçərək Rusiyanın ölkəmizdəki səfirliyinin müvəqqəti işlər vəkilini XİN-ə çağırıb və ciddi etiraz notası təqdim edib. Eyni zamanda, Azərbaycan Milli Məclisinin üzvləri, hüquq müdafiəçiləri və ictimai təşkilatlar bu zorakılığı insan hüquqlarına qarşı cinayət adlandıraraq məsələ ilə bağlı həm daxili, həm də beynəlxalq istintaq tələb ediblər.

Sfera.az xəbər verir ki, bu, son illər Rusiyada qeydə alınan yeganə belə hadisə deyil. 

Belə ki, mütəmadi olaraq azərbaycanlılar və digər Mərkəzi Asiya əsilli miqrantlar hüquq-mühafizə orqanlarının, həm də bəzi yerli qrupların fiziki və psixoloji zorakılığına məruz qalırlar.

2024-cü ilin əvvəlində Yekaterinburqda yenə onlarla miqrant zorakı şəkildə saxlanılmış, diz çökdürülərək təhqir edilmişdi. Daha əvvəl, 2013-cü ildə Moskvanın Biryulyovo rayonunda baş verən iğtişaşlar zamanı azərbaycanlılar daxil olmaqla, yüzlərlə miqrant zorakılığa və həbsə məruz qalmışdı. 2024-cü ilin martında Crocus City Hall-da baş verən terror aktından sonra da Rusiyada miqrantlara qarşı təzyiqlər daha da artmış, hüquq müdafiə təşkilatları minlərlə qanunsuz saxlanılma və onlarca işgəncə faktını sənədləşdirmişdi.

Statistik göstəricilər də bu neqativ meyilləri təsdiqləyir. Levada Mərkəzinin sorğularına əsasən, rusiyalıların təxminən 68 faizi miqrantların ölkədən çıxarılmasını dəstəkləyir. 45 faizə yaxını isə onları Rusiya cəmiyyətinə mənfi təsir göstərən amil kimi görür. Azərbaycanlı miqrantların əksəriyyəti təmizlik, tikinti, xidmət kimi ağır və aşağı maaşlı sahələrdə çalışsa da, cəmiyyətdə bu zümrəyə qarşı empatiya əvəzinə, etinasızlıq və ayrı-seçkilik hiss olunur.

Azərbaycan ictimaiyyəti və diasporası baş verən hadisələrə biganə qalmayıb. “Rusiya Azərbaycanlıları İcması” hadisə ilə bağlı bəyanat yayaraq zorakılığın hüquqi və beynəlxalq müstəvidə araşdırılmasını tələb edib. Azərbaycanda Rusiyaya aid bir sıra mədəni tədbirlər təxirə salınıb, ictimaiyyət məsələnin beynəlxalq tribunalar səviyyəsində müzakirəyə çıxarılmasını istəyir.

Ekspertlər bildirirlər ki, artıq söhbət tək-tək hadisələrdən deyil, sistematik təzyiq və etnik diskriminasiyadan gedir. Onların fikrincə, bu məsələlərin həlli üçün Azərbaycan və Rusiya arasında miqrantların hüquqlarını qoruyan konkret mexanizmlər yaradılmalı, həmçinin BMT, ATƏT və digər beynəlxalq təşkilatların hadisəyə müdaxiləsi təmin olunmalıdır.

Rusiya iqtisadiyyatında ciddi pay sahibi olan miqrantların hüquqlarının pozulması nəinki insani, həm də sosial-iqtisadi təhlükələr doğurur. Azərbaycandan Rusiyaya edilən pul köçürmələrinin 2024-cü ilin sonlarında 30 faizədək azalması da vəziyyətin ciddiliyindən xəbər verir.

Baş verənlər bir daha sübut edir ki, etnik mənsubiyyətə görə təzyiq və zorakılıq yalnız hüquq pozuntusu deyil, həm də cəmiyyətin dərin qatlarında formalaşmış ayrı-seçkiliyin nəticəsidir. Azərbaycanlıların Rusiya cəmiyyətində təhlükəsiz və ləyaqətli şəkildə yaşaması üçün ciddi hüquqi, diplomatik və ictimai tədbirlərə ehtiyac var.

Firuzə Əliyeva
Sfera.az