“ABŞ Prezidenti Donald Trampın Ukrayna siyasəti və beynəlxalq arenadakı davranışları Vaşinqtonun qlobal mövqelərinin zəifləməsi ilə nəticələnə bilər”.

Sfera.az xəbər verir ki, bu barədə Milli Cəbhə Partiyasının sədr müavini, politoloq Məhəmməd Əsədullazadə məlumat yayıb.

M.Əsədullazadənin sözlərinə görə, Tramp və Rusiya prezidenti Vladimir Putin arasında baş tutan son telefon danışığı nəticəsiz başa çatıb. Danışıqların məqsədi Ukrayna məsələsində irəliləyiş əldə etmək olsa da, Rusiya tərəfi nə atəşkəsə, nə də sülhə hazır olduğunu göstərib. Görüşün baş tutmamasına əsas səbəb də məhz bu olub.

“Telefon danışığından sonra Trampın Ukraynaya qarşı Rusiya zərbələrinə seyrçi qalması narahatlıq doğurur. O, təkcə Ukraynaya hərbi yardımı dayandırmayıb, həm də Rusiyaya qarşı yeni sanksiyaların tətbiqinin qarşısını alır. Bu, birbaşa olaraq Putinə verilmiş böyük bir hədiyyədir”.

Politoloq qeyd edir ki, Trampın bu siyasəti ABŞ Konqresində, xüsusilə Respublikaçılar Partiyası daxilində ciddi narazılıqla qarşılanır. Əgər Tramp bu xətt üzrə siyasətini davam etdirərsə, onun həm siyasi karyerası, həm də Respublikaçıların gələcək seçkilərdə uğuru sual altında qala bilər.

“Bu siyasət Respublikaçıların imicinə ciddi zərbədir. Belə davam edərsə, Trampın impiçmenti də istisna edilmir”, – deyə Əsədullazadə əlavə edib.

Ekspertin fikrincə, ABŞ Ukraynadan tam şəkildə geri çəkilərsə, Avropa İttifaqı və Böyük Britaniya beynəlxalq siyasi və hərbi güc mərkəzi kimi önə çıxacaq. Bu isə ABŞ-nin fövqəldövlət statusunun itməsi ilə nəticələnə bilər.

M.Əsədullazadə qeyd edir ki, Trampın prezidentliyə başladığı vaxtdan bəri heç bir ciddi uğuru olmayıb, daxili siyasətdə böhranlar yaşanıb. Kaliforniyada baş verən etirazlar da məhz onun uğursuz daxili siyasətinin nəticəsidir.

“Tramp strateji və müttəfiq ölkələrlə münasibətləri gərginləşdirib. Amerika qitəsində güclənmək niyyətinə baxmayaraq, Latın Amerikası və Kanada ilə soyuq münasibətləri var. Onun “ABŞ yenidən qayıtdı”, “güclü Amerika” kimi şüarları sadəcə populizmdir. ABŞ hazırda beynəlxalq müstəvidə öz qürub dövrünü yaşayır”, – deyə politoloq vurğulayıb.

Bəsti Rəfizadə
Sfera.az

Vaşinqtonun zəifləyən qlobal rolu: Trampın strategiyası nə vəd edir?