Pakistanın Müdafiə Naziri Xavaca Məhəmməd Asif Hindistanla müharibə riskinin artdığını bildirib.

Sfera.az xəbər verir ki, bu açıqlama, Kəşmirdə 26 hindistanlı turistin öldüyü hücumdan sonra verilib. Asif Hindistanın hərbi müdaxiləsinin “qaçılmaz” olduğunu və Pakistanın buna qarşı hazırlıqlı olduğunu qeyd edib. O, Hindistanla 2-4 gün ərzində müharibə təhlükəsinin olduğunu vurğulayıb.

Müharibə riski nə qədər realdır? İran, Əfqanıstan, ümumiyyətlə qonşu dövlətlərin müdaxiləsi gözləniləndirmi?

Mövcud suallarla bağlı Sfera.az- a açıqlama verən politoloq Əziz Əlibəyli tərəflərin beynəlxalq səviyyədə ciddi silahlanma dəstəyi aldığını deyib:

“Xüsusilə Hindistanın əldə etdiyi yeni silahlar beynəlxalq silahlanma hesabatlarında əks olunub və bu barədə son məruzələr yayımlanıb. Eyni zamanda, Pakistan tərəfinə də, xüsusilə vilayət əraziləri vasitəsilə Türkiyədən müəyyən silah daşınmalarının həyata keçirildiyi müşahidə olunur”.

Analitik bu prosesdə beynəlxalq aktorların müharibənin baş verməsində maraqlı olduqlarının açıq göründüyünü vurğulayıb.

O qeyd edib ki, Hindistan savaşın başlanması üçün aktiv şəkildə təşəbbüskar rol oynayır:

“Hindistanın arxasında dayanan dəstəkçi qüvvələr Pakistan kimi bir ölkəni zəiflətmək və eyni zamanda Çin Xalq Respublikasını bölgədəki proseslərə daha dərindən cəlb etmək istəyir. Belə bir vəziyyətdə savaşın başlaması demək olar ki, qaçılmaz görünür”.

Müsahibimizin fikrincə, Əfqanıstanın müxtəlif hərbi qruplaşmalarının da bu münaqişədə müəyyən rolu ola bilər:

“Eyni zamanda, Əfqanıstan ərazisində ABŞ-nin xüsusi hərbi bazasının yenidən qurulması məsələsi gündəmə gəlib. Taliban keçmişdə ABŞ-yə icarəyə verdiyi ərazini yenidən geri qaytararaq onun istifadəsinə verib. Bu isə Əfqanıstanın münaqişəyə həm ABŞ yönümlü, həm də arxadan Pakistan üçün təhdid yaradan ikiüzlü mövqe ilə yanaşmasına zəmin yaradır”.

Fidan Hacızadə

Pakistan vaxt qoydu - Hansı ölkələr müharibəyə qoşulur?