Rusiya və Ukrayna arasında atəşkəsin əldə edilməməsi rəsmi Vaşinqtonun daha sərt tədbirlərə əl atmasına səbəb ola bilər. Ehtimal edilir ki, ABŞ sərt tədbirlərdən biri kimi neft qiymətlərinin aşağı salınmasına çalışacaq.

Xatırladaq ki, Donald Tramp ABŞ prezidenti seçilməmişdən öncə belə bir variantın nəzərdən keçiriləcəyini bəyan etmişdi. Amma Rusiya ilə münasibətlərin normallaşması bu ehtimalı reallaşmasını minimuma endirdi.

Yenidən ABŞ və Rusiya arasında münasibətlərdə gərginlik müşahidə edilir. Bu gərginlik fonunda Vaşinqtonun neft qiymətlərinin endirilməsi variantından istifadə edə bilərmi?

Mövzu ilə bağlı Sfera.az-a açıqlama verən Politoloq Asif Nərimanlı ABŞ və Rusiya arasında baş verən gərginliyin enerji bazarına təsir imkanlarının olduğunu qeyd etdi.

A.Nərimanlı bildirdi ki, neftin qiymətinin tənzimlənməsi prosesində siyasi məsələlər həmişə mühüm rol oynayıb və bundan daha çox təsir vasitəsi kimi istifadə edilib:

"Dünyada baş verən siyasi, hərbi proseslər neftin qiymətinin tənzimlənməsinə ciddi təsir göstərir. Bir çox hallarda, xüsusilə böyük miqyaslı bazarlarda, neftin qiymətini müəyyən etmək üçün siyasi amillərin rolunu görürük.

Neftin qiymətinin enməsi Rusiya üçün arzuedilən deyil. Rusiyanın xərclərinə baxdıqda görürük ki, burada əsas rol oynayan faktor neftin qiymətidir. Buna görə də Rusiya daim enerji bazarlarında mövqeyini gücləndirmək, əməkdaşlığı genişləndirmək istəyir ki, neft qiymətləri çox enməsin. Amerika isə buna qarşı müxtəlif tədbirlər görür, bu da neftin qiymətinin tənzimlənməsinə təsir göstərir, xüsusən də Rusiyanın neft qiymətlərinin aşağı düşməsinə səbəb olur”.

Ekspert ABŞ dollarının da neftin qiymətləri üzərindəki təsir gücünə sahib olduğunu dedi:

"Dünyanın əsas neft ticarəti dollarla həyata keçirilir. Bu baxımdan, Amerika, neftin qiymətinin daha aşağı olmasında maraqlıdır, amma bu, tam olaraq Rusiya üçün yaxşı nəticələrə səbəb olmur.

Amerika həm də dünyada neft ticarətinin nəzarətini əlində saxlamağa çalışır. Bu, qiymətlərin artmasına səbəb ola bilməz, amma ABŞ, neftin qiymətinin minimallaşdırılmasına çalışır. Bu, Amerika üçün əhəmiyyətli bir strateji hədəfdir”.

Bəsti Rəfizadə

Rusiya "sözə qulaq asmasa", neft ucuzlaşa bilər