Prezident Administrasiyasının Xarici siyasət məsələləri şöbəsinin müdiri Hikmət Hacıyev “X”dəki hesabında bildirib ki, Ermənistan Cənubi Qafqaz regionunda ən böyük mina istehsalçısı olaraq qalmaqda davam edir. O qeyd edib ki, 10 fevral 2020-ci il tarixindən 23 fevral 2025-ə qədər cəmi minadan əziyyət çəkənlərin sayı 383 olub, bunlardan 70-i həlak olub, 3013-ü isə xəsarət alıb. Zərərçəkənlər arasında mülki şəxslərdən 55-i həlak olub, 143-ü yaralanıb, hərbçilərdən isə 15-i həlak olub, 169-u xəsarət alıb.

Ümumilikdə, 1991-ci ildən bu günə kimi 3400 nəfərdən çox minadan zərərçəkən var. Onlardan 359 nəfəri azyaşlı və gənc, 38 nəfəri isə qadınlardır.

Mövzu ilə bağlı Sfera.az-a açıqlama verən politoloq Kənan Novruzov bildirib ki, bu gün nəinki Azərbaycanın, ümumilikdə Cənubi Qafqazın əsas problemindən biri Ermənistandakı mina terrorudur.

Politoloq qeyd edib ki, işğaldan azad olunmuş ərazilərin sürətlə minalardan təmizlənməsinə baxmayaraq, hələ də Azərbaycanın mina qurbanları olur, müntəzəm olaraq belə hadisələrə şahidlik edirik:

“Bu özlüyündə Ermənistanın ifşası və beynəlxalq hüquqa yanaşmasının təzahürüdür. Görünən odur ki, Ermənistan o əraziləri əvvəlcədən minalayıb. Bu da onu deməyə imkan verir ki, onlar əvvəlcədən Qarabağın Ermənistanın olmayacağını bilirdilər. Bəziləri isə müharibə dövründə basdırılan minalardır. Bu da Ermənistanın insanlıq əleyhinə bəşəri cinayətidir”.

Politoloq vurğulayıb ki, Ermənistan bu əməllərinə görə müvafiq məsuliyyətə cəlb olunmalıdır:

“Ermənistan Azərbaycana, ölkəmizdəki mülki şəxslərə və ekologiyamıza vurduğu zərərə görə cavab verməlidir, təzminat ödəməlidir. Oxşar hadisələrdən çəkinməklə yanaşı, kompensasiya barədə də düşünməlidirlər. Onlar bu barədə düşünmədikcə və diplomatik formada daim utanc içində olmadıqca, növbəti təxribata və diversiyalara əl ata bilərlər. Bunun qarşısını almaq üçün mina terroru Damokl qılıncı kimi Ermənistanın başının üstündə olmalıdır”.

Firuzə Əliyeva

Ermənistanın tükənməyən terroru - Mina təhlükəsi necə sonlana bilər?