"ABŞ dollarına alternativ yaratsanız..." - Trampdan BRİKS ölkələrinə XƏBƏRDARLIQ

"BRİKS-ə üzv dövlətlər bir daha ABŞ dollarına yeni valyuta və ya hər hansı başqa alternativ yaratmağa cəhd edərlərsə, onlara 100% idxal rüsumları tətbiq ediləcək".

Sfera.az xəbər verir ki, bu sözləri ABŞ Prezidenti Donald Tramp “Truth” sosial şəbəkəsində yazıb.

“Biz bu zahirən düşmən kimi görünən ölkələrdən öhdəlik tələb edəcəyik ki, onlar nə yeni BRİKS valyutasını yaratsın, nə də güclü ABŞ dollarını əvəz edəcək başqa valyutaları dəstəkləsinlər. Belə bir şey olsa, 100% tariflərlə üzləşəcəklər. Beynəlxalq ticarətdə və ya başqa yerdə BRİKS-in ABŞ dollarını əvəz etmə şansı yoxdur və buna cəhd edən hər hansı bir ölkə Amerika ilə münasibətləri bitirməlidir”, - Tramp qeyd edib.

Qeyd edək ki, Hindistanın xarici işlər naziri Subrahmanyam Jaishankar ölkəsinin “heç vaxt dollarsızlaşdırmanın tərəfdarı olmadığını” vurğulayıb. Rusiya xarici işlər nazirinin müavini və BRİKS şerpası Sergey Ryabkovun sözlərinə görə, assosiasiya Trampa izah etməyə hazırdır ki, söhbət dollardan imtina etmək deyil, Vaşinqtonun yanlış siyasətindən nəticə çıxarmaqdır.

Xatırladaq ki, BRİKS qrupu 2006-cı ildə Braziliya, Rusiya, Hindistan və Çin tərəfindən yaradılıb, Cənubi Afrika isə 2011-ci ildə qoşulub. 1 yanvar 2024-cü ildə Misir, İran, Birləşmiş Ərəb Əmirlikləri və Efiopiya assosiasiyaya qoşulub. Səudiyyə Ərəbistanı da BRİKS-ə qoşulmaq üçün dəvət alıb, lakin onun səlahiyyətlilərinə görə, Ər-Riyad hələ də təklifi dəyərləndirir. 2024-cü ildə BRİKS-ə Rusiya sədrlik edirdi. Onun sədrliyi dövründə əsas hadisə oktyabrın 22-24-də Kazan Sammiti olub və burada BRİKS tərəfdaş ölkələr kateqoriyasının yaradılması qərara alınıb. İlk tərəfdaş ölkələr Belarus, Boliviya, Qazaxıstan, Kuba, Malayziya, Nigeriya, Tailand, Uqanda və Özbəkistan olub. İndoneziya da ilkin olaraq BRİKS tərəfdaşı adlandırılmışdı, lakin yanvarın 6-da Braziliya Asiya ölkəsinə tamhüquqlu üzv statusu verildiyini elan edib.

Firuzə Əliyeva