"Trampın ərazi iddiaları həm də Avropa Birliyinə meydan oxumaqdır, çünki..." - ŞƏRH

Son günlər ABŞ-nin yeni seçilmiş Prezidenti Donald Trampın qalmaqallı çıxışları müzakirə obyekti olub.

Bununla bağlı Sfera.az-a açıqlama verən politoloq Nazim Cəfərsoy deyib ki, Tramp hələ prezident olmadan bir sıra böyük geosiyasi məsələlərlə bağlı meydan oxuyur:

“Bunlardan biri Kanadanın ABŞ-nin 51-ci ştat olması təklifi əsasında Britaniyaya meydan oxumasıdır. Çünki Kanada “Commenwalt” üzvüdür və Britaniya kralı həm də Kanada kralı və dövlət başçısı hesab edilir. Britaniya kralı Kanadaya general-qubernator təyin edir. Kanada 1931 razılaşması ilə müstəqil dövlət sayılsa da, general-qubernatorun hüquqi və inzibati səlahiyyətləri çox olmasa da, siyasi və simvolik baxımdan bu durum yetərincə önəmlidir. Donald Trampın Qrelandiya adasına dair iddiaları isə Danimarka ilə yanaşı, Avropa Birliyinə də meydan oxumaqdır. Danimarkanın Avropa Birliyinin üzvü olmasını unutmamalıyıq”.

Ekspert bildirdi ki, yeni prezidentin Panama kanalına dair iddiaları bölgədə artan Çin təsirinə meydan oxumaq deməkdir:

“Son illərdə Panama kanalı bölgəsində Çinin çox ciddi fəaliyyətləri var. Trampın Meksika Körfəzinə dair iddiası isə Amerika qitəsində ABŞ-dən sonra ən ciddi güc və iddia sahibi Meksikaya meydan oxumadır. Ümumiyyətlə,Trampın müstəqil dövlətlərin suverenliyinə və ərazi bütövlüyünə dair açıq iddiaları və təzyiqləri gündəmə gətirməsi mövcud beynəlxalq münasibətlər sisteminin əsas sütunlarını baltalamaq deməkdir”.

Günay