Bu ölkələr Rusiyaya qarşı BİRLƏŞDİ: "Yeni silahlar, sanksiyalar..." - ŞƏRH

Böyük Britaniya, Fransa və Almaniya Ukraynaya hərbi dəstəyi artırır. Belə ki, Almaniya kansleri Olaf Şolts Ukraynaya səfərində Rusiyaya qarşı yeni bir hərbi mərhələnin başlanması mesajını verib.

Bununla bağlı Sfera.az-a açıqlama verən politoloq Məhəmməd Əsədullazadə deyib ki, Almaniya ABŞ-dən sonra Ukraynaya silah yardımı edən ikinci ən böyük dövlətdir:

“2025-ci ildə də Ukraynaya yeni silahlar, o cümlədən hava hücumundan müdafiə sistemləri, haubitsalar, hücum və kəşfiyyat pilotsuz uçuş aparatları, artilleriya mərmiləri, həmçinin 6 ədəd “Sea King” helikopteri veriləcək. Artıq Rusiyaya qarşı üç ölkə birgə mübarizə aparmaq barədə razılığa gəlib. Həmçinin Polşa da prosesdə aparıcı mövqeyini qoruyub saxlayır”.

Ekspert bildirib ki, Rusiyanın Ukraynada qalib gəlməsi mümkün görünmür:

“Rusiya Kiyevə yaxınlaşarsa, Fransa, Böyük Britaniya və Almaniya Ukraynaya ordu yeridə bilər. Artıq qarşılıqlı ballistik raketlərlə zərbə endirilməməsi barədə razılıq əldə edilib. Əgər Rusiya yenidən Ukraynaya uzaq mənzilli raketlərlə hücum edərsə, eyni analoji addımı Ukrayna da atacaq. Tramp Ağ Evə gəldikdən sonra da müharibənin davam etməsi gözlənilir. O, Rusiyaya qarşı sərt tədbirlər görə bilər”.

Günay Rəsulqızı

Sfera.az