İşğaldan azad olunmuş ərazilərdə bu torpaqlar icarəyə veriləcək - RƏSMİ

İşğaldan azad olunmuş ərazilərdə kənd təsərrüfatı təyinatlı torpaqlar icarəyə verilə bilər. 

Sfera.az xəbər verir ki, bu, Milli Məclisin bu gün keçirilən plenar iclasında müzakirəyə çıxarılan “Torpaq icarəsi haqqında” Azərbaycan Respublikasının Qanununa təklif olunan dəyişiklikdə öz əksini tapıb. 

Layihəyə əsasən, Azərbaycan Respublikasının işğaldan azad edilmiş ərazilərində kənd təsərrüfatı təyinatlı torpaqlar sahibkarlıq subyektlərinə müvafiq icra hakimiyyəti orqanının müəyyən etdiyi orqanın (qurumun)  müəyyən etdiyi qaydada investisiya müsabiqələri vasitəsilə icarəyə verilir.

Azərbaycan Respublikasının işğaldan azad edilmiş ərazilərində əhalinin məskunlaşdığı kənd və qəsəbə ərazi vahidlərinin sərhədləri daxilində yaşayış məntəqələrinə yaxın kənd təsərrüfatı təyinatlı torpaqlar müvafiq icra hakimiyyəti orqanının müəyyən etdiyi orqanın (qurumun) müəyyən etdiyi qaydada kənd və qəsəbə sakinlərinə (birillik və çoxillik əkinlərin aparılması üçün) güzəştli şərtlərlə icarəyə verilir.

Müzakirələrdən sonra qanun layihəsi birinci oxunuşda qəbul edilib. 

Firuzə Əliyeva