"Fransa iddia etdiyindən fərqli olaraq demokratiyadan çox uzaqdır" - ŞƏRH

Oktyabrın 15-də Afrika xalqlarının hüquqları uğrunda mübarizə aparan, tanınmış fəal Kemi Seba Fransa hüquq mühafizə orqanları tərəfindən qeyri-qanuni şəkildə saxlanılıb. Paris hələ də rəsmi mövqe açıqlamayıb. 

Bununla bağlı Sfera.az-a açıqlama verən siyasi şərhçi Kənan Novruzov deyib ki, Sebanın həbsi Fransa hakimiyyətinin artıq azadlıq uğrunda mübarizədən çəkinməyə başladığını göstərir. Onun sözlərinə görə, rəsmi Paris özünün iddia etdiyindən fərqli olaraq demokratiyadan çox uzaqdır. 

“Görünən odur ki, Yelisey Sarayı kolonialist siyasətini davam etdirməkdə israrlıdır. Əks halda belə təqiblərə yol verməzdi. Davam edən müstəmləkəçilik siyasəti isə, şübhəsiz ki, Fransaya müsbət nə isə verməyəcək. Əksinə, imicinə getdikcə daha çox zərbə vuracaq. Fransa hakimiyyəti bu barədə düşünməlidir”.

Siyasi şərhçi qeyd etdi ki, beynəlxalq ictimaiyyət Sebanın həbsinə reaksiya verməlidir:

“Rəsmi Paris qınanmalı və afrikalı siyasətçinin azadlığa buraxılması tələb olunmalıdır. Əks halda beynəlxalq ictimaiyyət də Fransanın bu qəbuledilməz addımına şərik olacaq.  Beləliklə, Fransa əslində öz-özünü ifşa edir. Əgər belə davam edərsə, Yelisey Sarayının dünyadakı nüfuzu getdikcə azalacaq”.

Günay Rəsulqızı