Ərdoğanla Putinin görüşündə nələr müzakirə olunacaq? - ŞƏRH
Oktyabrın 22-24-də Rusiyanın Kazan şəhərində BRİCS sammiti keçiriləcək. Burada Türkiyənin də iştirak etməsi gözlənilir. Hətta sammit çərçivəsində Ərdoğan və Putinin də görüşü istisna edilmir.
Bu konteksdə liderlərin görüşündə nələr müzakirə oluna bilər?
Bununla bağlı Sfera.az-a açıqlama verən Beynəlxalq Münasibətlər və Diplomatiya Araşdırmaları Mərkəzinin sədri Samir Hümbətov deyib ki, BRİCS sammitində Türkiyənin iştirak etməsi xüsusi əhəmiyyət daşıyır:
“Türkiyə artıq böyük bir təşkilata daxil olmaq istəyir. BRİCS isə iqtisadi potensial, siyasi təsir imkanlar baxımından önəmli təşkilatlardan biridir. Ona görə də hesab edirəm ki, Ərdoğanın orada iştirakı mümkündür. Bu, Rusiya üçün də sərfəlidir. Moskvanın dünyadan təcrid olunduğu bir zamanda Türkiyə prezidentinin orada olması vacibdir”.
S.Hümbətov qeyd etdi ki, Putinlə Ərdoğanın Aşqadabadda görüşəcəyi bildirilsə də, bu olmadı:
“İndi ortada yeni bir təklif var. İki liderin BRİCS sammiti çərçivəsində Kazanda görüşməsi gözlənilir. Fikrimcə, burada Ukrayna savaşının gələcəyi ilə bağlı məsələlərin müzakirəsi dərinləşə bilər. İkincisi, Putinin Türkiyə səfərinin müzakirəsi ehtimalı var. Eyni zamanda Suriyada baş verən hadisə də gündəmdə ola bilər. Təbii ki, BRİCS-in keçirilmə tarixinə kimi müəyyən müddət var. Hələ ki Rusiya dövləti gündəliyi açıqlamayıb. Sammitə hətta Azərbaycanın da dəvət olunması mümkündür. Fikrimcə, Putinin uzun müddətdir, Türkiyə səfərinin təxirə salınmasının başqa səbəbləri mövcuddur. Əgər Ərdoğan sammitdə iştirak edəcəksə, bu, görüşdə müzakirə olunacaq”.
Günay Rəsulqızı
