"Ukraynanın NATO-ya daxil olması III Dünya müharibəsinə səbəb olacaq" - Siyarto

Hazırkı şəraitdə Ukraynanın Şimali Atlantika Alyansına (NATO) qoşulması III Dünya müharibəsinə təkan verəcək.

Sfera.az xarici KİV-ə istinadən xəbər verir ki, bunu Macarıstanın xarici işlər naziri Peter Siyarto Sankt-Peterburq Beynəlxalq Qaz Forumu çərçivəsində jurnalistlərə açıqlamasında deyib.

"Mövcud şəraitdə Ukrayna NATO-ya üzv qəbul olunarsa, bu, III Dünya müharibəsinin başlanması demək olardı. Biz həmişə Rusiya ilə NATO arasında birbaşa qarşıdurmanın provokasiya edilməsinə qarşı çıxmışıq", - Siyarto bildirib.

Xatırladaq ki, 2023-cü ilin iyulunda Vilnüsdə keçirilən NATO-nun əvvəlki sammitində Zelenski üzv ölkələrin Ukraynanı NATO-ya üzv olmağa dəvət etmək üçün vaxt qrafikini azaltmaq istəmədiklərindən narazılığını bildirib. 

Qərb mediası ABŞ rəsmilərinin və NATO-ya üzv ölkələrin digər liderlərinin Zelenskinin sərt ifadələrindən qəzəbləndiyini bildirib. Sammitdən sonra Ukrayna lazımi tələblərə cavab verdikdə alyansa qoşulacağına əminlik verilib. Brüssel üzvlük üçün hər hansı son tarix barədə ətraflı məlumat verməyib. Buna baxmayaraq, NATO dəfələrlə vurğulayıb ki, Ukrayna müharibə şəraitində olarkən alyansa qoşula bilməz.

Firuzə Əliyeva