Bu ölkədə 21 günlük karantin tətbiq edildi
Uqanda Ebola virusunun ölkəyə yenidən daxil olmasının qarşısını almaq məqsədilə Konqo Demokratik Respublikasına səfər etmiş və geri qayıdan vətəndaşlar üçün 21 günlük məcburi karantin tətbiq edib.
Sfera.az xəbər verir ki, bu barədə Uqandanın səhiyyə naziri Kris Baryomunsi oktyabrın 25-də paytaxt Kampalada keçirilən mətbuat konfransında açıqlama verib.
Nazirin sözlərinə görə, Uqanda iyulun 28-də ölkədə Ebola epidemiyasının başa çatdığını elan etsə də, regionda virusun yayılması ilə bağlı risklər qalmaqdadır. Yeni qaydalara əsasən, Konqo Demokratik Respublikasına səfər etmiş Uqanda vətəndaşları geri qayıtdıqdan sonra 21 gün ərzində karantində saxlanılacaq. Karantin xərcləri onların özləri tərəfindən ödəniləcək.
Bununla yanaşı, Entebbe Beynəlxalq Hava Limanında və ölkənin quru sərhədlərində tibbi yoxlamalar gücləndirilib. Uqandaya daxil olan bütün sərnişinlər əlaqə məlumatlarını əks etdirən xüsusi formaları doldurmalı və sağlamlıq müayinəsindən keçməlidirlər.
Qərarın verilməsinə Keniyada və Nigeriyada qeydə alınan yoluxma halları da təsir edib. Hər iki ölkədə Ebola aşkarlanan şəxslərin Uqanda ilə əlaqəli səfər marşrutları olub.
Ümumdünya Səhiyyə Təşkilatının məlumatına görə, Keniyada ilk yoluxma halı Konqo Demokratik Respublikasından Uqanda üzərindən ölkəyə gələn şəxsdə aşkarlanıb. Həmin şəxs oktyabrın 5-də vəfat edib. Sonradan onunla əlaqəli daha səkkiz yoluxma halı qeydə alınıb.
Nigeriyada isə oktyabrın 20-də Uqandadan səfər etmiş qadında Bundibuqyo ştamına bağlı Ebola virusu təsdiqlənib. Həmin xəstənin virusa harada yoluxduğu hələ də araşdırılır.
Genetik analizlər Nigeriyada və Keniyada aşkarlanan virus nümunələrinin bir-birinə yaxın olduğunu göstərib. Bununla belə, iki xəstə arasında birbaşa təmasın baş verdiyi təsdiqlənməyib. Hər iki şəxsin oktyabrın 3-də Entebbe Beynəlxalq Hava Limanından keçməsi ehtimal olunan əlaqə istiqamətlərindən biri kimi araşdırılır.
Uqanda rəsmiləri Keniyada qeydə alınan ilk yoluxma ilə əlaqədar ölkədə müəyyən edilmiş 60 nəfərin 21 günlük müşahidə müddətini simptomlar olmadan başa vurduğunu və nəzarətdən çıxarıldığını bildiriblər.
Qeyd edək ki, Konqo Demokratik Respublikasında Ebola epidemiyası davam edir. ÜST-nin oktyabrın 20-dək olan məlumatına əsasən, ölkədə 9 704 təsdiqlənmiş yoluxma və 4 687 ölüm qeydə alınıb. Virusun digər ölkələrə yayılması regionda epidemioloji nəzarətin gücləndirilməsini zəruri edib.
Altay
Sfera.az
