Virtual karabakhyuxarı 900 dollara baxış sayı, 2000 dollara “Instagram”da göy işarəni satın alırlar - İDDİA +VİDEO

Xalq artisti Faiq Ağayev və müğənni Nigar Camal son vaxtlar gündəmdə olan sosial şəbəkələrdə yalandan trendə düşən, baxış sayı qazanan sənətçilər haqqında maraqlı açıqlamalar veriblər.

Sfera.az xəbər verir ki, "Söhbət var” proqramında sənətçilər hər şeyin pulla əldə edildiyini bildiriblər.

Faiq Ağayev həmkarlarının 900 dollara özlərinə baxış sayı aldıqlarını bildirib:

"Baxış sayları rüşvətlə alınır. Amma yaxşı işlərdə trendə düşür. Yerli, bir çox keyfiyyətli insanlarımız pul ödəmədən də trenddə birinci olur.

Ümumiyyətlə, hamısı pulla alınır. Bu barədə kimdən soruşsaq, "yox” deyəcək. Amma bunu çox asanlıqla bilmək olar. Hər kompüterin və telefonun öz şəxsi kodu var. Əgər girib baxılsa, Nigeriya, Polşa və Hollandiyadan onlara baxıldığını görmək mümkündür.   

Mən şəxsən həm "Instagram”da, həm də "Facebook”da Madonnanı izləyirəm. Heç onda bu qədər baxış sayı və ya rəy  yoxdur. Madonnanı hamı tanıyır. Maraqlıdır, Biləcəridən o tərəfə keçməyən müğənni necə olur ki, yeddi milyon baxış sayı qazanır?”   

Nigar Camal isə 1500-2000 dollara "Instagram”da göy işarəni satın aldıqlarını qeyd edib:

"Hətta mənə də bu təklif edilmişdi. Amma qəbul etmədim. Mənə yalandan olan nələrsə lazım deyil. Ümumiyyətlə, bu kimə lazımdır?

Azərbaycandan "Instagram”da 3,5 milyon qeydiyyatdan keçən var. Amma bizim müğənnilərdə baxış sayı bu rəqəmi keçib. Sonra da onlara Türkiyə və Rusiyadan baxıldığını deyirlər. Amma deyilənlər yalandır. Məsələn, şəxsən mən Emin Ağalarovu izləyirəm. Onu Azərbaycandan başqa bütün Rusiya tanıyır”.(oxu.az)