Qırğız Respublikasının Nazirlər Kabineti sədrinin müavini Bakıt Torobayevin rəhbərlik etdiyi nümayəndə heyəti Bakıda “Abşeron” Ticarət Mərkəzini ziyarət edib.

Sfera.az bildirir ki, heyət Azərbaycanda keçirilən iqtisadi və humanitar sahələr üzrə Azərbaycan–Qırğızıstan Hökumətlərarası Komissiyasının 6-cı iclasında iştirak məqsədilə ölkəmizdə səfərdədir.

Görüş zamanı qonaqlar “Abşeron” Ticarət Mərkəzində kiçik və orta biznes üçün yaradılmış imkanlarla tanış olublar. Tədbirdə Qırğızıstanın 15-dən artıq nazirlik və dövlət qurumunu təmsil edən nazir müavinləri, müşavirlər və digər yüksək vəzifəli şəxslər, Qırğız Respublikasının Azərbaycan Respublikasındakı səfiri Maksat Mamıytkanov, Azərbaycan Respublikasının Qırğızıstandakı səfiri Lətif Qəndilov, Azərbaycan–Qırğızıstan İnkişaf Fondunun həmsədrləri Zamirbek Osmonov və İqbal Babayev, həmçinin ReefGroup şirkətinin rəhbəri Azər Şükürov və Xəzər Beynəlxalq Fondunun rəhbəri Adəm Bakuvi iştirak ediblər.

“Abşeron” Ticarət Mərkəzi Müşahidə Şurasının üzvü Elnur Osmanov qonaqlara geniş təqdimatla çıxış edərək layihənin konsepsiyası, infrastruktur həlləri və sahibkarlara təqdim olunan imkanlar barədə məlumat verib. Bildirilib ki, mərkəz həm sahibkarlıq fəaliyyətinə dəstək mexanizmləri, həm də müasir şəhərsalma trendlərinə uyğunluğu ilə seçilir. Təxminən 300 hektarlıq ərazini əhatə edən mərkəzdə 1500-dən çox mağaza fəaliyyət göstərir. Sahəsinə və strukturuna görə “Abşeron” Ticarət Mərkəzi Avropa və Yaxın Şərqin aparıcı ticarət məkanları ilə müqayisə olunur.

Təqdimatdan sonra nümayəndə heyəti ticarət mərkəzi ərazisini gəzərək sahibkarlarla görüşüb, onlar üçün yaradılan şərait və tətbiq olunan güzəştlərlə maraqlanıb.

Qırğız nümayəndə heyəti “Abşeron” Ticarət Mərkəzində sahibkarlarla görüşdü - FOTOLAR