Astrologiya ilə maraqlanan insanların ən çox müzakirə etdiyi mövzulardan biri də bürclərin evlilik uyğunluğuna təsir edib-etməməsidir.

Sfera.az xəbər verir ki, astroloji mənbələrdə yayımlanan təhlillərdə bəzi bürc cütlüklərinin münasibətlərdə daha çox çətinlik yaşadığı iddia olunur. Məlumata görə, ən problemli hesab edilən bürc uyğunluqları arasında Qoç-Xərçəng, Buğa-Dolça, Əkizlər-Əqrəb, Şir-Oğlaq, Qız-Oxatan və Tərəzi-Balıqlar cütlükləri yer alır. Astroloqlar bildirirlər ki, bu bürclər emosional ehtiyaclar, qərarvermə tərzi və həyata baxış baxımından bir-birindən xeyli fərqləndiyi üçün münasibətlərdə anlaşılmazlıqlar daha tez-tez yarana bilər. Məsələn, sərbəstliyi və spontan davranışları ilə seçilən Qoç bürcü təhlükəsizlik və emosional sabitliyə üstünlük verən Xərçənglə münasibətdə çətinlik çəkə bilər. Eyni zamanda, yenilikçi və müstəqil xarakterli Dolça ilə ənənəvi dəyərlərə bağlı Buğa arasında da fikir ayrılıqlarının yaşana biləcəyi qeyd olunur.

Lakin mövzu ilə bağlı elmi araşdırmalar fərqli nəticələr ortaya qoyur. İsveçdə milyonlarla insanın məlumatları əsasında aparılan genişmiqyaslı tədqiqat bürclərin nə evlilik seçimlərinə, nə də boşanma ehtimalına əhəmiyyətli təsir göstərdiyini müəyyən edib. Mütəxəssislərin fikrincə, uğurlu münasibətin əsasını qarşılıqlı hörmət, etibar, sağlam ünsiyyət və ortaq dəyərlər təşkil edir.

Onlar vurğulayırlar ki, astrologiya bəzi insanlar üçün maraqlı istiqamətləndirici vasitə olsa da, münasibətlərin taleyini müəyyən edən əsas faktor hesab edilə bilməz. Beləliklə, astroloji təhlillərdə bəzi bürclərin bir-biri ilə uyğun gəlmədiyi irəli sürülsə də, elm münasibətlərin uğurunun ulduzlardan deyil, tərəflərin davranışlarından və münasibətə göstərdikləri səydən asılı olduğunu göstərir.

Fidan Hacızadə

Sfera.az

Bu bürclər bir-biri ilə evlənməməlidir - ADLAR