"Mango" geyim brendinin təsisçisi, 2024-cü ildə dağlarda müəmmalı şəraitdə həlak olan milyarder İsak Andikin oğlu Conatan Andik İspaniyada atasını qətlə yetirməkdə şübhəli bilinərək həbs olunub.

Sfera.az xəbər verir ki, bu barədə "El País" qəzeti məlumat yayıb.

45 yaşlı Conatan Andik artıq bir müddətdir ki, məxfi saxlanılan iş üzrə istintaq altında idi. Kataloniya polisi hazırda onun telefonundakı məlumatları araşdırır. Andik ailəsi isə öz növbəsində bəyan edib ki, o, "məhkəmə araşdırması çərçivəsində" ifadə verir və onun məhkəmə sistemi ilə əməkdaşlığı "mütləq şəkildə davam edəcək".

71 yaşlı İsak Andik Montserrat dağlarında gəzinti zamanı həlak olub. Həmin vaxt onun yanında yalnız üç övladının ən böyüyü və ailə sərvətinin əsas varisi hesab olunan Conatan olub. Polisi də məhz o çağıraraq, atasının təsadüfən qayadan yıxılaraq bədbəxt hadisə nəticəsində öldüyünü bildirib.

Müstəntiqlər Andikin 100 metrdən çox hündürlükdən düşdüyünü müəyyən edib və ilkin olaraq hadisəni adi bədbəxt hadisə kimi araşdırıblar. Lakin Conatanın ifadələrində ziddiyyətlər aşkar edildikdən sonra iş yeni məcra alıb. Polis, xüsusən də onun hadisədən bir neçə gün əvvəl həmin marşrutda olduğunu müəyyən edib. Vəkilləri isə onun sadəcə səfərə hazırlaşdığını iddia edirlər.

İstintaq ata ilə oğul arasında xüsusilə şirkətin idarə olunmasında Conatanın rolu ilə bağlı ciddi münaqişələrin olduğunu təsdiqləyib. İsak Andik 2014-cü ildə idarəçiliyi oğluna ötürmək qərarına gəlsə də, bir il sonra yeni komanda formalaşdırmaq və şirkəti yenidən canlandırmaq üçün rəhbərliyə qayıtmaq məcburiyyətində qalıb. Bu isə onların arasındakı münasibətləri kəskinləşdirib.

Milyarderin ölümündən sonra ailədaxili münasibətlər də pisləşib. Onun sevgilisi və övladları miras üstündə mübahisə etməyə başlayıblar (biznesmenin sərvəti 4,5 milyard dollar qiymətləndirilirdi və o, İspaniyanın ən zəngin 5 şəxsindən biri idi).

Vəsiyyətnaməyə əsasən, biznesmenin mirası üç övladı arasında bölünməli idi. Bundan əlavə, o, son yeddi il ərzində yaxın münasibətdə olduğu 52 yaşlı keçmiş peşəkar qolfçu, sevgilisi Estefaniya Knuta 5 milyon avro miras qoyub.

Lakin Knut bu məbləği az hesab edərək 70 milyon avro tələb edib. Uzun sürən danışıqlardan sonra Andikin övladları və Knut ona təxminən 30 milyon avro ödənilməsi barədə ilkin razılığa gəliblər. Maraqlıdır ki, müstəntiqlərə biznesmenin oğlu ilə olan münaqişələri barədə məhz Estefaniya danışıb və bu, işdəki əsas ipuclarından birinə çevrilib./musavat

Məşhur milyarder QƏTLƏ YETİRİLİBMİŞ - Oğlu həbs edildi