"TikTok" bu ölkələrdə qadağan edilib - SİYAHI

Çinin sosial media platforması "TikTok"u qadağan edən ölkələrin sayı günü-gündən artır.

Bəs "TikTok" hansı ölkələrdə qadağandır? 

Sfera.az "TikTok"un qadağan olunduğu ölkələri təqdim edir:

Avropa Birliyi

Avropa Komissiyası və Aİ Şurası kibertəhlükəsizlik tədbiri olaraq 23 fevral 2023-cü ildə "TikTok"u işçilərinə müvəqqəti olaraq qadağan edib.Komissiyadan verilən açıqlamada deyilir: “Komissiyanın Korporativ İdarəetmə Şurası kibertəhlükəsizliyi artırmaq məqsədilə Komissiyanın mobil cihaz xidmətində qeydiyyatdan keçmiş korporativ cihazlar və fərdi cihazlarda "TikTok" tətbiqinin istifadəsini dayandırmaq qərarına gəlib”.

Qısa müddət sonra Avropa Parlamenti fevralın 28-də "TikTok"u hökumət tərəfindən verilən bütün telefonlardan bloklayacağını açıqlayıb. Bu, Avropada qadağalar dalğasına səbəb oldu və digər ölkələr də buna əməl etdi.

İngiltərə 

Böyük Britaniya hökuməti 16 mart 2023-cü ildə bütün dövlət elektron cihazlarında "TikTok"a qadağa qoyub.Hökumət Nazirlər Kabinetinin apardığı təhlükəsizlik araşdırması Çin hökumətinin müdaxiləsi və nəzarəti qorxusuna görə video paylaşma proqramının qadağan edilməsinə qərar verdi.

Qadağanın elan edildiyi gün çıxış edən Lankaster Hersoqluğunun kansleri Oliver Dowden dedi: "Həssas hökumət məlumatlarının təhlükəsizliyi birinci yerdə olmalıdır, buna görə də bu gün bu proqramı hökumət cihazlarında qadağan edirik".

ABŞ

ABŞ-nin Montana ştatında Çin sosial media platforması "TikTok" tətbiqini tamamilə qadağan edən qanun layihəsi qəbul edilib. Digər tərəfdən, Nyu York Bələdiyyəsi "TikTok"un dövlətə məxsus cihazlarda istifadəsini qadağan etdi.

Yeni Zelandiya

Yeni Zelandiya 17 mart 2023-cü ildə "TikTok"un bütün parlament cihazlarında qadağan olunduğunu elan etdi. Ölkənin deputatlarına parlament xidmətindən elektron poçt vasitəsilə məlumat verilib. 

Danimarka

Danimarka 2023-cü ilin mart ayında "TikTok"un iş cihazlarında qadağan edilməsini əmr etdi. Ölkənin Müdafiə Nazirliyi təhlükəsizliklə bağlı narahatlıqlara istinad edərək, işçilərə proqramı mümkün qədər tez silməyi əmr edib.

Əfqanıstan

Taliban 2022-ci ilin aprelində Əfqanıstanda "TikTok"u qadağan edərək, platformanın məzmununun "İslam qanunlarına uyğun olmadığını" bildirib.

Kanada

Digər ölkələrə uyğun olaraq, Kanada bu ilin fevral ayında bütün hökumət mobil cihazlarında "TikTok"u qadağan etdi. Xəzinədarlıq Şurasının prezidenti Mona Fortier qismən qadağanın tətbiqin "məxfilik və təhlükəsizlik üçün qəbuledilməz səviyyədə risk" yaratdığı üçün olduğunu söylədi.

Tayvan

TikTok 2022-ci ilin dekabrında Tayvanın hökumət cihazlarında qadağan edilib. Bu addım FTB-nin "TikTok"un milli təhlükəsizlik riski yaratdığı barədə xəbərdarlıq etməsindən sonra atılıb.ABŞ FTB direktoru Kris Vray qadağadan bir neçə gün əvvəl Miçiqan Universitetində etdiyi çıxışında "TikTok"dan istifadəyə qarşı xəbərdarlıq edib.Vray Çinin tövsiyə alqoritmini idarə edərək istifadəçilərin tətbiqdə gördüklərini idarə etmək qabiliyyətinə sahib olduğunu söylədi. Onun sözlərinə görə, bu yolla ölkə “istədikləri təqdirdə məzmunu manipulyasiya edə və təsir əməliyyatları üçün istifadə edə bilər”.

Nepal

Nepal 2023-cü ilin noyabrında "TikTok" tətbiqini qadağan edəcəyini açıqlayaraq, məşhur video tətbiqinin "sui-istifadəsi" səbəbindən ictimai harmoniya, xoş niyyətin pozulduğunu və tətbiqə nəzarət tələbinin artdığını bildirib.

Firuzə Əliyeva