“Azərbaycanda rəsmi milyonçular siyahısı olmasa da, bu gün ölkənin böyük şəhərlərində, xüsusən də Bakıda dəyəri milyonlarla ölçülən qeyri-yaşayış obyektləri mütəmadi olaraq alınır və satılır”.

Bunu Sfera.az-a açıqlamasında əmlak məsələləri üzrə ekspert Elnur Fərzəliyev deyib. Müsahibimiz bu cür obyektlərə tələbatın çox olduğunu vurğulayıb:

“Xüsusilə də şadlıq evləri, ticarət mərkəzləri və digər böyük iaşə obyektlərinin satış qiymətləri təqribən 5-25 milyon manat aralığında dəyişir. Dəyəri 1 milyon manatdan aşağı olan obyeklərə isə təlabat həddindən artıq coxdur. Buna səbəb bahalı obyektlərin yaxşı icarə pulu verməsidir. Digər tərəfdən, vətəndaşlar pulu əmlak formasında saxlamağa üstünlük verirlər. Bu da istənilən vaxt obyekti sataraq onu pula çevirməyə imkan verir”.

Ekspert həmçinin bu cür əmlakların kirayə verildiyini, bunun da hər ay sabit, böyük gəlir demək olduğunu qeyd edib:

“Daimi əmlak bazarında qiymət artımı olduğuna görə vətəndaş aldığı əmlakı nə vaxtsa satanda qazanclı olur. Yəni aylıq kirayə pulundan əlavə, həm də əmlakı daha baha qiymətə satışa çıxara bilir və kapital olaraq bu, daha əlverişlidir”.

Günay Rəsulqızı