Qadınların gözəllik üçün etdirdiyi kosmetoloji prosedurlarla yanaşı, kosmetoloqların da sayında artım müşahidə edilir. Lakin onların əksəriyyətinin bu sahədə təhsili yoxdur. Müvafiq tibbi təhsili olmayanlara müraciət isə xoşagəlməz nəticələr doğurur.

Bəs kosmetoloqun peşəkar olub-olmadığını necə müəyyən etmək olar?

Mövzu ilə bağlı Sfera.az-a danışan həkim kosmetoloq Lalə Orucova bildirib ki, bir çox şəxslər kurslara gedərək bu işi görürlər.

“Yəni onların tibbi təhsili yoxdur. Bundan məlumatsız olan vətəndaşlar isə prosedurdan sonra fəsadlarla üzləşirlər. Bu isə qeyri-peşəkar kosmetoloqların buraxdığı səhvlərlə əlaqədardır. Məhz bu baxımdan mütləq savadlı həkimlərə müraciət etmək lazımdır".

Lalə Orucova diqqətə çatdırıb ki, pasientlər həkimə gedən zaman preparatın şəklini çəksinlər və onun barədə məlumat alsınlar.

“Onlar həkimdən preparatın sertifikatını da tələb etməlidirlər. Pasientlərin əksəriyyəti, əsasən, qiymət baxımından ucuz olanı seçirlər. Amma kosmetoloji prosedurlar ucuz deyil. Deməli, bir prosedur ucuz edilirsə, o kosmetoloqdan şübhələnmək lazımdır”.

Ülkər Abdurahmanlı