Uels şahzadəsi Keyt Middlton tez-tez "Zara" brendindən seçdiyi geyimləri ilə görüntülənir. Ancaq maraqlıdır ki, şahzadə həmin geyimləri olduqca bahalı göstərməyi bacarır. 

Sfera.az Keyt Middltonun ucuz geyimləri bahalı göstərmək üçün istifadə etdiyi texnikaları təqdim edir:

Keytin “Zara”dan etdiyi seçimlər sanki onun üçün xüsusi hazırlanmış kimi üstünə tam oturur. Çoxumuzun qarderobunda “Zara”dan nəsə var. Dünyanın ən böyük moda pərakəndə satıcılarından biri olduğu üçün, bundan qaçınmaq mümkün deyil: hətta sürətli modadan imtina edənlər də xeyriyyə mağazası və ya eBay vasitəsilə “Zara” məhsulunu ikinci əl əldə etmiş ola bilərlər.

40 manatlıq ətək

Uels şahzadəsi də fərqli deyil. Sifarişlə əldə edilən “Catherine Walker” paltoları, “Alessandra Rich” donları və “Roland Mouret” imzalı geyimlərlə dolu bir qarderobu olmasına baxmayaraq, hətta Keyt də boş vaxtı olanda “Zara”ya göz gəzdirməyə bilmir. Əvvəllər o, “King's Road”dakı filialda geyimlərə nəzər salarkən görünüb. Lakin indi onlayn alış-verişə və ya Windsordakı mağazaya baş çəkməyə üstünlük verir. 

Şahzadənin son tapıntısı hamının diqqətini çəkdi - 2020-ci il istehsalı olan midi ətək. Həmin ətəyi “Zara”nın veb-saytında “əvvəllər sevilən” bölməsində tapmaq olar, 20 funt sterlinqə (40 manat) satılır. Ola bilsin ki, bu, onun köhnə sevimlisidir; bəlkə də doğru fürsət yaranana qədər onu “qış yuxusunda” saxlayıb. Görünür, həmin ətəyi geyinmək üçün ən doğru zaman Uelsin Port Talbot şəhərindəki fitness mərkəzində, Müqəddəs David Günü münasibətilə keçirilən tədbir idi.  Bəlkə də həmin gün həyat yoldaşını idman velosipedi yarışında udmasında geyiminin də xüsusi rolu varmış.

Stilist toxunuşu

Ketrin və onun uzun illərdir stilisti olan Nataşa Arçer başa düşür ki, hər tərəfdən fotoşəkil çəkiləcək. Buna görə də onlar geyimi ucuz göstərən boş ipləri kəsmək, büzülmüş tikişləri düzəltmək və uyğunluğun mükəmməl olmasını təmin etmək üçün çox güman ki, dərzi ilə işləyirlər. 

Daha bir hiylə: bahalı ilə ucuzu qarışdır

Ketrin ətəyini “Alexander McQueen” palto, “Gianvito Rossi” çəkmələri və “Mulberry Amberley” çantası ilə kombinləyib. Onların kontekstində “Zara” ətək daha dəbdəbəli görünür.

Saxta brilyant və mirvari sırğalar

Keytin əlçatan qiymətə satılan aksessuarı da var. “Heavenly London” tərəfindən istehsal olunan 90 funt-sterlinq dəyərindəki saxta brilyant və mirvari sırğaları şahzadə on ildən artıqdır ki, istifadə edir. 

Keyfiyyətli və uzunömürlü 

Çoxları Keytin belə ucuz qiymətə satılan geyim və aksessuarlardan istifadə etdiyinin fərqinə vara bilmir. Çünki şahzadə qarderobuna ancaq uzunömürlü parçalar əlavə edir. Seçdiyi ətəyin parçası çox keyfiyyətli görünür, bu, indi və ya 10 ildən sonra geyinə biləcəyi bir şeydir. 

Ən uzun solo Qütb ekspedisiyasına görə dünya rekordunu qıran kapitan Preet Çandi ilə ötən həftə görüşən Keyt Midlletonun seçimi yenə “Zara”dan olub, bu dəfə krem rəngində tüvit pencəyi ilə diqqət çəkib.
 

Şahzadənin digər brendlərə də yanaşması oxşardır. O, “Zara”nın “dəbdəbəli bacısı” “Massimo Dutti”dən bir neçə geyimə - yaşıl kostyum, şalvar və s.-ə sahibdir. “Hobbs” paltosunu çox sevir. Bu ayın əvvəlində 369 funt sterlinqlik "Celeste" stili ilə görüntülənib. O, həmçinin “Reiss”, “Jigsaw” və “Sezane”də tez-tez görünür.

Əlbəttə, hamımızın “Zara” geyimlərimizlə qarışdırmaq üçün “McQueen” paltomuz yoxdur, amma dərzidən kömək almağımıza heç nə mane ola bilməz. Stilistə gəlincə, etibarlı rəfiqə onu əvəz edə bilər  və bu, ən azından pulsuzdur.

Lalə
Sfera.az