2022-ci ildə dünya üzrə milyarderlərin ümumi sərvətində azalma müşahidə edilir.

Sfera.az xəbər verir ki, 2021-ci ilin martında 13,1 trilyon dollar olan sərvətin dəyəri 2022-ci ilin mart ayında 12,7 trilyon dollara düşüb.

İsveçrənin UBS bankının məlumatına görə, bu il milyarderlərin sayı əvvəlki ilin mart ayı ilə müqayisədə 87 nəfər azalıb. Araşdırmaya əsasən, ən ciddi dəyişikliklər maliyyə və investisiya sahəsində müşahidə olunub. İl ərzində bu sektorda 50 yeni milyarder peyda olub, 30-u isə bu kateqoriyadan çıxıb. Texnologiya sektorunda 41 yeni milyarder yaranıb. Araşdırmanın məlumatına görə, istehsal sektorunda milyarderlərin sayı 7 nəfər azalaraq 338-ə düşüb.

2022-ci ilin mart ayına olan məlumata görə, ən çox milyarder hələ də Asiya-Sakit Okeanı regionundadır. Bu regionda 1084 milyarder var. Onların sayı keçən illə müqayisədə 59 nəfər azalıb. ABŞ-dəki milyarderlərin sayı 2021-ci ildəki 724 nəfərdən bu il 735 nəfərə yüksəlib. Onların ümumi sərvəti isə 4,7 trilyon dollara çatıb.

Qərbi Avropada milyarderlərin sayı bir il ərzində 7 nəfər azalsa da, sərvətləri əvvəlki kimi qalıb. Avropalı milyarderlərin bank hesablarında 2,3 trilyon dollar var. UBS-in məlumatına görə, Şərqi Avropadakı milyarderlərin sayı Ukraynadakı Rusiya münaqişəsinin təsirinə məruz qalıb. Onların regionda sayı 154-dən 127-yə, ümumi sərvəti isə üçdə birdən çox azalaraq 455 milyard dollara düşüb.

Vasif

Sfera.az