Novruz bayramında koronavirus RİSKİ: Yoluxma artacaq? - İnfeksionist açıqladı
Media
19:25 / 15.03.2022
2122
Bayram ərəfəsində müxtəlif şənliklərin keçirilməsi, gediş-gəliş məsələsi aktuallaşır. Buna görə də insanlar arasında yaxın təmas digər günlərə nisbətdə daha çox olur. Bu isə pandemiyanın davam etdiyi dövrdə bir qədər riskli məsələdir.
Bu il Novruz bayramı yoluxma sayına təsir edəcək?
Mövzu ilə bağlı Sfera.az-a danışan infeksionist İlham Namazov bayram günlərində yoluxma sayının arta biləcəyini, lakin bunun təhlükəli hal almayacağını deyib:
"Bayramda gediş-gəliş çoxaldığı üçün koronavirusa yoluxmanın artması normal haldır. Lakin indiki məqamda ölkəmizdə koronavirusa qarşı buster dozadan istifadə edildiyi üçün yoluxmanın çox olması və ağırlaşmaların olması real görünmür. Artıq insanlarda xəstəliyə qarşı immun sistemi formalaşıb və vaksinasiya bunu gücləndirib. Hər kəs məsuliyyyətini dərk edib qoruyucu maskalardan istifadə etsə və sosial məsafəni gözləsə qısa müddətdə pandemiyanın sonlanmasına şahidlik edəcəyik”.
İnfeksionist bayramlarda rayonlara getməyin təhlükəli olduğunu deyib:
"Adətən bayramlarda şəhərdən rayon, kənd bölgələrinə ciddi axın olur. Virusa yoluxma ehtimalını nəzərə alaraq bu il də bu məsələdə diqqətli olsaq daha yaxşıdır. Düşünürəm ki, növbəti il, növbəti bayramda belə riskli vəziyyət olmayacaq. Nəzərə almaq lazımdır ki, mutasiyadan sonra yeni yaranan ştamlar özünə yeni xüsusiyyətlər də qazanır. Yeni ştamların yaranmaması və yayılmaması üçün bir qədər diqqətli olmaq lazımdır”.
Əzizə Zeynal
