Fransada etirazlar zamanı talan edilən mallar küçələrdə satışa çıxarıldı
Fransada həftəsonu şiddətlənən etirazlardan sonra talan edildiyi iddia olunan malların küçələrdə açıq şəkildə satışa çıxarıldığını əks etdirən görüntülər sosial şəbəkələrdə yayılıb.
Sfera.az xəbər verir ki, ölkədə təxminən bir aydır davam edən tələbə etirazları məktəblərdəki şəraitə, təhsil büdcəsinə və dövlət xidmətlərindəki çatışmazlıqlara qarşı başlayıb. Lakin sonradan aksiyalar ölkə miqyaslı iğtişaşlara çevrilib.
Fransa Daxili İşlər Nazirliyinin məlumatına görə, şənbə günü keçirilən aksiyalarda təxminən 550 min nəfər iştirak edib.
Nümayişlər zamanı maskalı qrupların iştirakı ilə zorakılıq halları, yanğınlar və talanlar baş verib. Paris, Marsel, Lill, Bordo, Lion, Nitsa, Strasburq və digər şəhərlərdə supermarketlər, elektronika mağazaları, kosmetika dükanları və lüks brendlərin butikləri hədəfə alınıb.
Mağazaların vitrinləri sındırılıb, giriş qapıları zorla açılıb, rəflərdəki məhsullar götürülüb.
Limoges şəhərində tarixi bələdiyyə binası yanğın nəticəsində ciddi zərər görüb. Lyonda isə turizm ofisi yanıb, bəzi dövlət binalarına hücum edilib. Həmçinin avtomobillər yandırılıb, polis və nümayişçilər arasında qarşıdurmalar yaşanıb.
Fransa Prezidenti Emmanuel Makron baş verənlərə münasibət bildirərək, “Küçələrimizin talan edilməsi qəbuledilməzdir”, –deyib.
O, hadisələrə görə məsuliyyət daşıyan şəxslərin cəzalandırılacağını vurğulayıb.
Bəzi ərazilərdə təhlükəsizlik tədbirləri gücləndirilib, o cümlədən komendant saatına bənzər məhdudiyyətlər tətbiq olunub.
Hadisələrdən sonra sosial şəbəkələrdə talan edilmiş məhsulların həm onlayn ikinci əl satış platformalarında, həm də küçələrdə satışa çıxarıldığını göstərən görüntülər və elanların ekran görüntüləri yayılmağa başlayıb.
Bəzi platformalarda kosmetik vasitələr, idman ayaqqabıları, formalar, videooyunlar və lüks əşyalar satışa çıxarılıb.
Fransanın rəqəmsal məsələlər üzrə naziri Anna Le Henanff platformalardan oğurluq yolu ilə əldə edildiyi iddia olunan məhsullara dair elanların dərhal silinməsini tələb edib. O, məsələ ilə bağlı aidiyyəti qurumların iştirakı ilə görüş keçirilməsinə də çağırış edib.
“Vinted” platforması isə “sıfır tolerantlıq” siyasəti tətbiq etdiyini və məsələ ilə bağlı səlahiyyətli orqanlarla əməkdaşlıq etdiyini açıqlayıb.
Bununla yanaşı, küçələrdə də talan edilmiş malların səkilərdə sərgilənərək adi qiymətlərdən daha ucuz satıldığı iddia olunur. Bəzi satıcıların məhsulların haradan əldə edildiyini göstərmək üçün talan anlarına aid videolar nümayiş etdirdiyi də bildirilir.
Bəsti Rəfizadə
Sfera.az
