Pəhriz saxlayanlar diqqətli olsun
Sağlam qidalanmağa çalışan insanların tez-tez üstünlük verdiyi “light”, “şəkərsiz” və “sıfır kalorili” məhsullar heç də həmişə göründüyü qədər sağlam olmaya bilər. Mütəxəssislər bildirirlər ki, məhsulun üzərindəki “şəkərsiz” və ya “light” ifadəsinə aldanmaq əvəzinə, onun tərkibi diqqətlə yoxlanılmalıdır.
Sfera.az xəbər verir ki, Medipol Koşuyolu xəstəxanasının dietoloqu Nazlı Aydın bu cür məhsulların tərkibində qlükoza siropu, rafinə olunmuş karbohidratlar və müxtəlif qatqı maddələrinin ola biləcəyini bildirib.
Dietoloqun sözlərinə görə, məhsulun həqiqətən sağlam olub-olmadığını müəyyənləşdirmək üçün qablaşdırmanın ön hissəsinə deyil, arxa tərəfindəki tərkib siyahısına baxmaq lazımdır. Tərkibin mümkün qədər sadə olması və çoxsaylı komponentlərdən ibarət olmaması vacibdir. Adını və nə məqsədlə istifadə edildiyini bilmədiyiniz çox sayda qatqı maddəsi varsa, həmin məhsulu yenidən nəzərdən keçirmək tövsiyə olunur.
Aydın “şəkərsiz” yazısının hər zaman məhsulun təhlükəsiz olduğu anlamına gəlmədiyini də vurğulayıb. Onun sözlərinə görə, bəzi məhsullarda qlükoza siropu, fruktoza siropu, nişasta törəmələri və rafinə olunmuş karbohidratlardan istifadə edilə bilər.
Bu maddələr qan şəkərində kəskin dəyişikliklərə, insulinin yüksəlməsinə və daha tez aclıq hissinin yaranmasına səbəb ola bilər. Nəticədə insan gün ərzində ehtiyacından daha çox kalori qəbul edə və daha sağlam olmayan qidalara üstünlük verə bilər.
Dietoloq təbii hesab edilən bəzi məhsullara da diqqət yetirməyin vacibliyini bildirib. Məsələn, sağlam seçim hesab edilən xurmanın belə emal zamanı əlavə şəkər tərkibli maddələrlə işlənə biləcəyini qeyd edib. Buna görə də məhsulun yalnız təbii görünüşünə deyil, etiketdəki tərkibinə də diqqət etmək lazımdır.
Nazlı Aydın həmçinin “çörək yemirəm, amma pəhriz məhsulu yeyirəm” yanaşmasının düzgün olmadığını bildirib. Onun sözlərinə görə, pəhriz yalnız müəyyən bir məhsulu seçməkdən ibarət deyil. Əsas məsələ karbohidrat, zülal və yağ arasında düzgün balans yaratmaqdır.
Mütəxəssis vurğulayıb ki, məhsulun “light”, “şəkərsiz” və ya “sıfır kalorili” kimi təqdim olunması onun avtomatik olaraq sağlam olduğu anlamına gəlmir.
Mənsumə
