Yer kürəsini iki günlük maqnit qasırğası bürüyəcək – BU TARİXDƏ
Britaniya Geoloji Xidmətinin alimləri oktyabrın 9-10-da Yerdə geomaqnit aktivliyin artacağını proqnozlaşdırıblar.
Sfera.az xəbər verir ki, alimlərin məlumatına görə, oktyabrın 9-da Günəşdə oktyabrın 6-da baş verən partlayış zamanı ayrılmış plazma buludunun Yerə çatacağı gözlənilir.
Bu hadisənin G1 və G2 səviyyəli maqnit qasırğalarına səbəb ola biləcəyi bildirilir. Proqnoza əsasən, geomaqnit aktivlik ən azı iki gün – 9 və 10 oktyabr tarixlərində davam edəcək. Plazma buludunun saniyədə təxminən 560 kilometr sürətlə hərəkət etdiyi və oktyabrın 9-da Bakı vaxtı ilə təxminən saat 08:00-da Yerə çatacağı gözlənilir.
Alimlər həmin gün orta səviyyəli maqnit aktivliyi və əlverişli şərait yaranarsa, şimal işıqlarının daha aşağı enliklərdə də müşahidə edilə biləcəyini bildiriblər. Oktyabrın 11-də isə sürətli Günəş küləyinin təsirinin güclənəcəyi proqnozlaşdırılır.
Qeyd edək ki, ilkin məlumatlarda “6 ballıq” maqnit qasırğası ifadəsi işlədilsə də, Britaniya Geoloji Xidmətinin proqnozunda G1 və G2 səviyyələri göstərilir.
