Elektrik olmadan soyudur: Alimlərdən kondisionerin sonunu gətirən İXTİRA
İspaniyanın Elmi Tədqiqatlar Ali Şurasının (CSIC) alimləri günəş altında qalan səthləri elektrik enerjisi sərf etmədən soyuda bilən nanomaterial hazırlayıblar.
Sfera.az xəbər verir ki, Mikro və Nanotexnologiya İnstitutunun (IMN-CNM, CSIC) tədqiqatçıları tərəfindən hazırlanmış material istiliyi kosmosa yayaraq binalarda, avtomobillərdə və elektron cihazlarda kondisionerə olan tələbatı azaltmağa imkan verə bilər.
Tədqiqatçılar bildirirlər ki, soyutma sistemləri hazırda qlobal elektrik enerjisi istehlakının təxminən 20 faizini təşkil edir. Yeni texnologiyanın geniş tətbiqi soyutma üçün enerji xərclərinin və bununla bağlı emissiyaların azaldılmasına kömək edə bilər.
Araşdırma “Nanophotonics” jurnalında dərc olunub və gündüz passiv radiasiya ilə soyutma prinsipinə əsaslanır. Bu üsul Yer atmosferinin infraqırmızı spektrdə 8-13 mikrometr arasında yerləşən xüsusi “pəncərəsindən” istifadə edir. Həmin diapazonda istilik atmosfer tərəfindən tutulmadan birbaşa kosmosa yayıla bilir.
Alimlər bunun üçün istiliyi infraqırmızı diapazonda effektiv şəkildə yayan poliviniliden flüorid (PVDF) adlı polimerdən istifadə ediblər. Material ultrabənövşəyi şüalara davamlıdır, suyu dəf edir və xarici təsirlərə qarşı yüksək dayanıqlılıq göstərir.
Tədqiqatın əsas yeniliyi isə materialın xüsusi nanostrukturda hazırlanmasıdır. Alimlər polimeri anodlaşdırılmış alüminium oksidinin nanoməsaməli qəliblərinə yerləşdirərək daxili quruluşu dəqiq idarə olunan üçölçülü strukturlar yaradıblar.
Optimallaşdırılmış material günəş şüalarının orta hesabla 82,4 faizini əks etdirib, istilik şüalanmasının isə 8-13 mikrometr diapazonunda 96,7 faizini kosmosa ötürüb.
Hesablamalara görə, material hər kvadrat metrə 182,3 vatt soyutma gücü yarada bilir. Madrid yaxınlığındakı Tres Kantos şəhərində aparılan sınaqlar da texnologiyanın effektivliyini təsdiqləyib.
Ən isti, quru və günəşli günlərdə xüsusi örtüklə işlənmiş səthin temperaturu örtüksüz nümunə ilə müqayisədə 12,9 dərəcə Selsiyə qədər aşağı olub.
Tədqiqatçılar texnologiyanın hələ inkişaf mərhələsində olduğunu bildirirlər. Bununla belə, istehsal prosesinin nisbətən ucuz olması və mövcud sənaye üsullarına uyğunlaşdırıla bilməsi onun binaların fasad və damlarında, avtomobillərdə, elektron cihazlarda və fərdi soyutma sistemlərində istifadəsinə imkan yarada bilər.
Alimlərin əsas məqsədi kondisionerlərdən asılılığı azaltmaq və soyutma prosesinin yaratdığı enerji sərfiyyatı və emissiyaların qarşısını almaqdır.
İnci
Sfera.az
