Günəşdən ayrılan zərrəciklər Yerə doğru hərəkət edir - FOTO
Günəşdə baş verən nadir görülən cüt partlayış nəticəsində Yer kürəsinin maqnit sahəsində ciddi dəyişikliklər müşahidə oluna bilər. ABŞ-nin Milli Okean və Atmosfer İdarəsi (NOAA) bu gün geomaqnit qasırğasının baş verəcəyi ilə bağlı xəbərdarlıq yayıb.
Sfera.az xarici mediaya istinadən xəbər verir ki, mütəxəssislərin bildirdiyinə görə, Günəşdən ayrılan və “koronal kütlə atımı” (CME) adlanan yüklü zərrəciklər Yerə doğru hərəkət edir.
Bu parçacıq buludlarının G2 kateqoriyalı geomaqnit fırtınasına səbəb olacağı ehtimal olunur. Bu isə şimal işıqlarının (auroraların) yalnız qütb bölgələrində deyil, daha cənub ərazilərdə də görünməsinə imkan yaradacaq.
CME-lərin təsiri ilə səma hadisələrinin dəqiq baş verəcəyi vaxtı proqnozlaşdırmaq çətindir. Auroraların görünməsi CME-nin daşıdığı maqnit sahəsinin Yer ilə necə qarşılıqlı əlaqəyə girməsindən asılıdır. Əgər bu əlaqə güclü olarsa, səma rəngarəng auroralarla bəzənə bilər. Əks halda, Yerin maqnit sahəsi bu təsirlərə qarşı qalxan rolunu oynayaraq şimal işıqlarının yaranmasının qarşısını ala bilər.
Mütəxəssislər, vəziyyəti yaxından izlədiklərini və aurora müşahidələri üçün əlverişli şəraitin yaranmasının mümkün olduğunu bildiriblər.
Bəsti Rəfizadə
